Кондак 1
Избранная от всех родов Заступнице вселенныя, похвальный глас Твоих рабов приемши, Всеблаженная, избави нас от всяких бед, да пред иконою Твоею и мы архангельский привет поем усердною душею:
Радуйся, всем радостем Ты еси радость, Всеблаженная.

Икос 1
Архангел Божий Гавриил, началовождь небесных сил, предста Тебе, Отроковице, совет превечный открывая и еже «Радуйся» вещая: «Ты Мати будеши, Владычице». Тому последующе верно, дерзаем вси нелицемерно воспети радостный сей глас Тебе, молящейся о нас:
Радуйся, рождшая Жизнь всем утроба;
Pадуйся, грешнаго мира спасение.
Радуйся, Сын Твой воскресе от гроба;
Pадуйся, Евиных слез избавление.
Радуйся, древняго змия поправшая;
Pадуйся, узы греха растерзавшая.
Радуйся, радость женам несказанная;
Pадуйся, Божия милости дверь.
Радуйся, ангелов песнь непрестанная;
Pадуйся, Богу избранная Дщерь.
Радуйся, твари всея ожидание;
Pадуйся, грешником всем упование.
Радуйся, всем радостем Ты еси радость, Всеблаженная.

Кондак 2
Видяще образ Твой сей Умиление, токи целебныя всем источающий, тепле к нему притекаем смиреннии, в нуждах и скорбех спасения чающе. Ты же Христа умоли, яко Мати, всяко прошение нам даровати, яко да присно Тому воспоим песнь благодарну пред образом сим: Аллилуиа.

Икос 2
Разум небесный стяжа Серафим, тяжким недугом лежа одержим; Тя бо моляше болезнь исцелити. Ты же, Благая, пришедши во сне, кротце предстала ему в тишине, отроку жизнь обещавши продлити. Темже, от смерти Тобою спасенный, сладце воспе Серафим умиленный:
Радуйся, высшая неба небес;
Pадуйся, Мати Господня святая.
Радуйся, рождшая бездну чудес;
Pадуйся, стамно щедрот всезлатая.
Радуйся, Ты бо нам милость являеши;
Pадуйся, всяку болезнь исцеляеши.
Радуйся, душ и телес врачевство;
Pадуйся, падших благое возстание.
Радуйся, горних умов торжество;
Pадуйся, грешников к небу воззвание.
Радуйся, Бога за нас умоляеши;
Pадуйся, вражию сеть сокрушаеши.
Радуйся, всем радостем Ты еси радость, Всеблаженная.

Кондак 3
Силою Вышняго дивно храним, в силу от силы в душе преспеваше в юности чистей святый Серафим. В храм Пресвятыя усердно хождаше и, умиленно молитву творя, сердцем хвалу во псалмех восписуя, Бога всещедраго благодаря, присно пояше Ему: Аллилуиа.

Икос 3
Имея Тя спутницу верную в жизни, остави избранник Твой юный отчизну, в обитель Саровскую путь направляя. Слагая бо в сердце Твоя словеса, отечество мняше свое небеса, пустынных живот на земли ублажая. И, слышав: «От нашего рода есть сей», Тебе воспеваше, надежде своей:
Радуйся, веры звездо путеводная;
Pадуйся, Кормчия жизни моей.
Радуйся, спутнице, к Богу доходная;
Pадуйся, крове от бури страстей.
Радуйся, к Богу бо нас управляеши;
Pадуйся, душу спасти вразумляеши.
Радуйся, правды стезе незаблудная;
Pадуйся, мосте, горе возводяй.
Радуйся, нищим Помощнице чудная;
Pадуйся, венче, сердца веселяй.
Радуйся, в Царствие нас призываеши;
Pадуйся, двери рая отверзаеши.
Радуйся, всем радостем Ты еси радость, Всеблаженная.

Кондак 4
Бури житейския скоро спасает Божия Мати вдовицу блаженную, жребий вручити ей Свой обещает, землю возделати благословенную. Темже, Пречистыя воли послушна, в путь неизвестный отходит вдовица, претерпевающи вся благодушно, дондеже в жребий святый водворится, Девы глагола в терпении ждущи, Богу же Сыну прилежно поющи: Аллилуиа.

Икос 4
Слыша вдовица глагол долгожданный, в тонцем дремании ей провещанный: «Зде есть в Дивееве место Мое, зде есть Мой жребий четвертый избранный, зде ты положиши кости твоя, девам пристанище прежде создавши». Темже вдовица, от ложа воставши, Матери Света за радость святую светло поет похвалу таковую:
Радуйся, света обитель блаженная;
Pадуйся, Богом избранный удел.
Радуйся, скиние Бога священная;
Pадуйся, добрых сокровище дел.
Радуйся, милости море безбрежное;
Pадуйся, душ тишино безмятежная.
Радуйся, вдов к чистоте окормление;
Pадуйся, девства сосуде драгий.
Радуйся, в старости сил укрепление;
Pадуйся, в юности жезле благий.
Радуйся, Дево Марие нетленная;
Pадуйся, Господом благословенная.
Радуйся, всем радостем Ты еси радость, Всеблаженная.

Кондак 5
Божией Матери гласу внимающи храм Ея имени вдова созидает; малое стадо сирот собирающи во благочестии тех возращает. Тако в Дивееве Божие семя в добрую землю вложися во время, плод же в терпении свой принесе, яко да мы от плода днесь вкушающе, Матерь Благую Творца небесе благодарим, о Ней песнь воспевающе: Аллилуиа.

Икос 5
Видивше первоначальница мати, яко обитель начат возрастати Девы Марии словес в исполнение, малое стадо свое поручает старцем Саровским и мудро вверяет паствы духовное все окормление. И, преспевающи в жизни своей, благодарящи источник чудес Деву Марию за помощь с небес, песни слагает похвальныя Ей:
Радуйся, тихая наша отрадо;
Pадуйся, имя Тебе — Умиление.
Радуйся, Мати словеснаго стада;
Pадуйся, места сего прославление.
Радуйся, нам бо покров простираеши;
Pадуйся, нас ко Христу собираеши.
Радуйся, девам Ты светлый чертог;
Pадуйся, сирых от бед ограждаеши.
Радуйся, Тя бо послушает Бог;
Pадуйся, плачущих всех утешение.
Радуйся, немощи наша терпящая;
Pадуйся, нас во благих богатящая.
Радуйся, всем радостем Ты еси радость, Всеблаженная.

Кондак 6
Бысть проповедница милости всех в своем житии Александра честная, Божие Имя всегда во устех, в сердце и мысли молитва святая. Слезныя токи Тебе, приношаше, Тя, Живоносный Источниче, чтущи, труд же дневный неустанно творяще, духом горяще и Богу поюще: Аллилуиа.

Икос 6
Возсиявающи свет благодати в дивном Дивееве, Божия Мати Свой омофор простирает над ним, козни врага и наветы людския, немощи духа и страсти плотския, нужды обычныя людем земным, — вся утоляет Царица благая, скоро Своим сиротам помогает. Темже, поюще Тоя чудеса, радостно рцем Ей сия словеса:
Радуйся, свете спасения благостный;
Pадуйся, чистых сердец красото.
Радуйся, совести мире, всем сладостный;
Pадуйся, духа любве широто.
Радуйся, цветниче благоухающий;
Pадуйся, жезле, враги устрашающий.
Радуйся, в немощи помощь всесильная;
Pадуйся, в скорби утехо с небес.
Радуйся, в скудости пище обильная;
Pадуйся, вышшая всяких словес.
Радуйся, Божий бо гнев утоляеши;
Pадуйся, милость на нас призываеши.
Радуйся, всем радостем Ты еси радость, Всеблаженная.

Кондак 7
Хотящи оставити мир сей растленный, блаженная вкупе сирот собирает и Матери Бога удел, ей врученный, Пахомия старца блюсти умоляет; Пречистыя образ на перси приемлет и в руце Владычицы дух предает. Исполненный скорби Пахомий ей внемлет и песнь ей надгробную сице поет: Аллилуиа.

Икос 7
Новый Дивееву ангел-хранитель, жребия Девы и дев устроитель, послан Пречистою бысть Серафим. Купно с прехвальным Петром, с Иоанном, в келии Дева предста несказанно, светлая, с мучениц ликом святым, благоухающи миром небесным. «Дев ты Моих не остави», — вещает; помощь ему по вся дни обещает, он же приносит Ей дар свой словесный:
Радуйся, славо пророков прекрасная;
Pадуйся, крине удолий рая.
Радуйся, мучениц песнь велегласная;
Pадуйся, стершая слезы моя.
Радуйся, грешных молитв не забывшая;
Pадуйся, сирых Твоих посетившая.
Радуйся, наша пред Сыном Споручнице;
Pадуйся, с Богом принесшая мир.
Радуйся, душ Жениховых Обручнице;
Pадуйся, двернице званным на пир.
Радуйся, тайны от века явление;
Pадуйся, Дево, Тебе мое пение.
Радуйся, всем радостем Ты еси радость, Всеблаженная.

Кондак 8
Странных видений причастник блаженный, благостный старец отец Серафим к сердцу приемлет завет незабвенный Девы Марии и, Ею водим, девам обитель особую строит; меру соборному храму дает, место святое канавкой обводит, паству Пречистыя верно пасет, правило жизни и чин полагает, Богу неленостно пети внушает: Аллилуиа.

Икос 8
Всецелым умом ся Христу сраспиная, блаженства рая на земли предвкушая, пояше святый, яко благ тех виновней, Марии, родившей нам Спасшаго нас, архангельский Той, еже «Радуйся», глас прилежно всегда с простотою сыновней. Тому подражая, Мариин удел доныне обходит свой древний предел, хвалу Богородице Деве поя, да радости будет причастник Тоя:
Радуйся, о Богородице Дево;
Pадуйся, рождшая Спаса Христа.
Радуйся, Бога вместившая в чрево;
Pадуйся, плод Твой — нам Путь живота.
Радуйся, радостей вечных виновная;
Pадуйся, славо и радость церковная.
Радуйся, девственниц чистых венчание;
Pадуйся, иноков Щедрая Мати.
Радуйся, матерей всех величание;
Pадуйся, доме, исполнь благодати.
Радуйся, стрелы во дни угашающи;
Pадуйся, страхи в нощи прогоняющи.
Радуйся, всем радостем Ты еси радость, Всеблаженная.

Кондак 9
Всяких сил ангельских, Дево, превысшую, хвалят немолчно Тя наша сердца, светлостей солнечных истинно чистшую, Тя величает вся тварь без конца. Ты же Ходатаица за нас буди к Сыну и Богу в день страшный суда; грешных молений тогда не забуди, пети сподоби нас Богу всегда: Аллилуиа.

Икос 9
Витий многогласных не может язык воспети достойно Твой сладостный лик, о Дево и Мати Владыки небес. Даров Твоих чудных и сил умножение сердца исполняет росы умиления, дает очесем всех источники слез. Твой образ святый ее свещею горящею всегда веселяше взор старца молящаго, егда на колена склонився пред ним, усердно хваляше Тя пением сим:
Радуйся, всех безнадежных Надеждо;
Pадуйся, сердцу росо умиления.
Радуйся, правды лишенных одеждо;
Pадуйся, всем нам источник спасения.
Радуйся, демонский лик низлагаеши;
Pадуйся, грозно бесам запрещаеши.
Радуйся, духом унылых возстание;
Pадуйся, палице спящим во зле.
Радуйся, стропотных душ наказание;
Pадуйся, вся бо возможна Тебе.
Радуйся, в горьких работах всем сладость;
Pадуйся. Мати, скорбящим всем радость.
Радуйся, всем радостем Ты еси радость, Всеблаженная.

Кондак 10
Спасительно постными сеяв слезами, ждет в радости старец от Девы вещание: «Ты скоро, любимиче, будеши с нами». И духом покоен, в живом уповании, отход свой от мира предуготовляет. Устав свой молитвенный и наставления хранити сирот своих он поучает: от днесь вам Благая едина хранение; вы многия пестуны имате, чада, отец же не будет разве мене, на гробе моем ищите отрады, и в нуждах и в скорбех идите ко мне; и верую, даст вам Господь утешение, да присно восходит от вас Ему пение: Аллилуиа

Икос 10
Стена еси девам, Пречистая Дево, от вражиих козней, от нужды и гнева, Тебе бо вручи нас святый Серафим. И в час испытания дух наш смятенный к Тебе мы возносим в молитве смиренней: о буди помощница сирым Твоим; да весело хвалим Тя, присноблаженную, всемирную славу, хвалу неизменную:
Радуйся, верных Твоих утверждение;
Pадуйся, крепкая сирых стено.
Радуйся, Церкве святыя хваление;
Pадуйся, горним умом глубино.
Радуйся, цвете наш неувядаемый;
Pадуйся, граде, Царя прославляемый.
Радуйся, лествице, к Богу возведшая;
Pадуйся, облаче легкий Христов.
Радуйся, росо руно произведшее;
Pадуйся, всем Ты готовый покров.
Радуйся, наша Надеждо известная;
Pадуйся, дев Похвало неневестная.
Радуйся, всем радостем Ты еси радость, Всеблаженная.

Кондак 11
Пение всякое днесь побеждается множеством благодеяний Твоих; милость Твоя на весь мир простирается, славо небесных и радость земных. Гласа бо Матери богоприятнаго Сын Твой послушает, Дево, всегда. Радость всем радостем Ты, Благодатная, — звати мы не умолчим никогда. Тако бо зваше Тебе преподобный, Богу поя, наш предстатель загробный: Аллилуиа.

Икос 11
Света открыся чертог вожделенный старцу, в молитве к Тебе восхищенну, Дево, пред образом сим Умиления. В руце пречистеи душу святую Ты восприяла еси — во иную жизнь безконечную в райских селениях. Плакаху чада, отца их лишенная, новым же знанием умиленная милости к старцу Твоей, растворяюще слезы надгробныя песнею красною, Тя величаху хвалою согласно, Матерь едину Тебе разсмотряюще:
Радуйся, темныя власти стенание;
Pадуйся, праведных душ торжество.
Радуйся, вратников ада рыдание;
Pадуйся, Тя бо поет естество.
Радуйся, князя мытарств низложившая;
Pадуйся, демонов гордость смирившая.
Радуйся, имя, святым вожделенное;
Pадуйся, в смертный помощниче час.
Радуйся, радость нам неизреченная;
Pадуйся, в час той услыши наш глас.
Радуйся, наших сердец умиление;
Pадуйся, Бога умилостивление.
Радуйся, всем радостем Ты еси радость, Всеблаженная.

Кондак 12
Благодатный залог в ограждение, чадом дивеевским старец остави образ Пречистыя сей Умиления. Сам же пресветло ликуя во славе, Матерь Небесную молит усердно сирых его соблюсти милосердно, да не воздремлют уныния сном, но да, елеем свещу напояюще, внидут в чертог со своим Женихом, вечную ангелов песнь воспевающе: Аллилуиа.

Икос 12
Поем днесъ Твою Богородице, славу и милость ко грешным, на бесы державу; вси празднуем светло Твоя чудеса. Безмерно Тя всю освятив, непорочная, Бог людем постави Тя в крепость всемощную: Тебе бо внимают Того ушеса. Тобою спасаеми вси ежечасно, приносим Ти песнь таковую согласно:
Радуйся, жизни сокровище вечныя;
Pадуйся, правды ковчеже святый.
Радуйся, людем хвало безконечная,
Pадуйся, свещниче веры златый.
Радуйся, Божие благоволение;
Pадуйся, всех человеков спасение.
Радуйся, мученик всех дерзновение:
Pадуйся, песнь преподобных Твоих.
Радуйся, праведных жен украшение;
Pадуйся, краю желаний благих.
Радуйся, церкве хоругвь пречестная;
Pадуйся, грешным нам Мати благая.
Радуйся, всем радостем Ты еси радость, Всеблаженная.

Кондак 13
О Мати всепетая, всем во спасение даждь, Всеблагая, сердец умиление. Да, Божиим страхом всегда ограждаемы, избегнем губительных сетей борца, и тако Твоими мольбами спасаеми, во веки восхвалим благаго Творца: Аллилуиа.
Этот кондак читается трижды, затем икос 1-й и кондак 1-й

Молитва ко Пресвятой Богородице перед Ея иконой, именуемой «Умиление» (Серафимо-Дивеевская)
Приими, всеблагомощная, Пречистая Госпоже, Владычице Богородительнице, сия честныя дары, Тебе единей прикладныя, от нас, недостойных рабов Твоих: от всех родов избранная, всех тварей небесных и земных высшая явльшаяся, понеже бо Тебе ради бысть Господь Сил с нами, и Тобою Сына Божия познахом и сподобихомся святаго Тела Его и пречистыя Крове Его; темже блаженна еси в родех родов, Богоблаженная, херувимов светлейши и серафимов честнейши сущая. И ныне, всепетая Пресвятая Богородице, не престай молящися о нас, недостойных рабех Твоих, еже избавитися нам от всякаго совета лукаваго и всякаго обстояния и сохранитися нам неврежденным от всякаго ядовитаго прилога диавольскаго; но даже до конца молитвами Твоими неосужденных нас соблюди, яко да Твоим заступлением и помощию спасаеми, славу, хвалу, благодарение и поклонение за вся в Троице Единому Богу и всех Создателю возсылаем, ныне и присно, и во веки веков. Аминъ.

Тропарь Божией Матери ради иконы Ее «Умиление», или «Радость всех радостей», Серафимо-Дивеевской
Тропарь, глас 4:
К Богородице со умилением припадем, вси грехми обремененнии, чудотворную Ея икону Умиления облобызающе и вопиюще со слезами: Владычице, приими моление недостойных раб Твоих и подаждь нам, просящим, велию Твою милость.

Кондак, глас 3:
Юже подражая неплодную смоковницу, аз, окаянный, умиления плода отнюд не приношу и посечения страшуся, но, взирая к чудотворней иконе Твоей Умиления, Владычице, стеню от сердца и вопию: умилися, Благосердая, и мне, окамененному сердцем, благоволи подати душевное и сердечное умиление.

Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.