Кондак 1
Взбранной Воеводе, Пренепорочней Деве Богородице, Заступнице нашей и предстательству христиан непостыдному, явлением чудныя иконы Своея радование подавшей земле Российстей и вся верная чада Церкве просветившей, благодарение усердно приносим Ти, Богородице, и припадающе Пречудному образу Твоему умильно глаголем: спаси, Госпоже, и помилуй рабы Твоя зовущия: Радуйся, Мати Божия, Предстательнице и Заступнице наша усердная.

Икос 1
Архангел Гавриил от Бога послан бысть во град Назарет ко Пречистей Деве Марии, и вшед к Ней рече: «Радуйся, Благодатная, Господь с Тобою, благословена Ты в женах». Архангельскому гласу подражающе, и мы, грешнии, радости и благодарения в сердцы своем исполнени, пред явленным образом Твоим благохваления наша возносити к Тебе дерзаем, Пресвятая Богородице:
Радуйся, отрасле от корене Давидова благословенная;
Pадуйся, обетом родителей в жертву Богу принесенная.
Радуйся, святых праведных Иоакима и Анны Дщи Богоданная;
Pадуйся, триех лет во храм Божий введенная и тамо воспитанная.
Радуйся, тамо смирением и чистотою всех удивившая;
Pадуйся, тамо Архангельския беседы сподобльшаяся.
Радуйся, Дево, о зачатии Бога Слова благовестие во смирении приимшая;
Pадуйся, избранная Отроковице, к зачатию Бога Слова силою свыше осененная.
Радуйся, тайну воплощения Сына Божия, от веков в Бозе сокровенную, открывшая;
Pадуйся, Агнице, рождшая Агнца Христа, вземшаго грехи мира.
Радуйся, Тобою бо избавляемся мук адовых;
Pадуйся, Тобою бо сподобляемся вечныя жизни.
Радуйся, Мати Божия, Предстательнице и Заступнице наша усердная.

Кондак 2
Видя икону Твою, Пресвятая Дево, на древе стоящу, князь благочестивый костромский ужасом многим содрогашеся недоумея, что бысть видение сие? Хотящу же ему прийти ю и от сего свыше удержану ему бывшу, не можаше; уведев, яко чудно есть иконы тоя явление, воззва к Богу: Аллилуиа.

Икос 2
Разумом желая разумети князь благочестивый пришествие пречудного Твоего образа во град Кострому, Богородице, душею радования преисполненною себе предале водительству Божию, и преклонь колена, со страхом вопияше Тебе:
Радуйся, Дево, явльшая образ Свой чудно;
Pадуйся, Благословенная, в явлении образа Своего милосердие нам являющая.
Радуйся, о всех чтущих Сына Твоего промышляющая;
Pадуйся, всем просящим у Тебе дары, в меру веры, ко спасению подающая.
Радуйся, путь истины заблуждшим показующая;
Pадуйся, к горнему миру чудесы Твоими ум наш возводящая.
Радуйся, смущения помышлений сумнительных удаляющая;
Pадуйся, славящих Тя всегда прославляющая.
Радуйся, чистотою Твоею чистоте нас научающая;
Pадуйся, чистотою Твоею нечистоту нашу обличающая.
Радуйся, моления наша приемлющая;
Pадуйся, рыданий и слез неотметающая.
Радуйся, Мати Божия, Предстательнице и Заступнице наша усердная.

Кондак 3
Силу Божию благочестивый князь познав в восхождении образа чуднаго Твоего, Богомати, в явлении же видев милосердие Твое ко всем, спасение хотящим получити, рече: Аллилуиа.

Икос 3
Имев помысл стяжати даруемое небесное сокровище, лик Твой светлый, Богомати, второе простре державный руку к образу низшедшему: узрев же паки его восхождение, скоро пойде во град и поведа о бывших ему освященному собору, да пришедше и видяще иконы Твоея явление возопиют с ним вернии:
Радуйся, Царице Небесе и земли;
Pадуйся, престоле Царя царствующих.
Радуйся, Пренепорочная Дево;
Pадуйся, Мати Неприступнаго Света.
Радуйся, Честнейшая Херувим;
Pадуйся, Славнейшая без сравнения Серафим.
Радуйся, небесными силами величаемая;
Pадуйся, от всех земнородных ублажаемая.
Радуйся, неизреченное веселие Ангелов;
Pадуйся венче царственный всех пророков и апостолов.
Радуйся, православия Христовы Церкве ограждение;
Pадуйся, всех суемудрых учений и ересей низложение.
Радуйся, Мати Божия, Предстательнице и Заступнице наша усердная.

Кондак 4
Бурю внутрь имея помышлений недоуменных, освященный собор со псалмы и песньми духовными абие притече видети образ Твой, Неискусобрачная. Узрев же его на древе дивно стояща и благолепно красотою сияюща, рече: Аллилуиа.

Икос 4
Слышаша людие честныя иконы Твоея, Богоотроковице, пришествие, и ко оной текше покланяхуся, аки Самей Тебе сущей, и со умилением и слезами вопияху к Тебе:
Радуйся, Дево, благословенная в женах, во чреве Твоем Носителя всяческих носившая;
Pадуйся, рождением Сына Твоего спасение миру всему явльшая.
Радуйся, человеки с Богом соединившая;
Pадуйся, превышшая Небес, избавльшая нас от клятвы.
Радуйся, нас к вечней жизни руководящая;
Pадуйся, Владычице мира.
Радуйся, Божие к смертным благоволение;
Pадуйся, смертных к Богу дерзновение.
Радуйся, благих во благости соблюдающая;
Pадуйся, лукавых на путь благий обращающая.
Радуйся, под сень крова Твоего прибегающих милующая;
Pадуйся, уповающим на Тя вся потребная к животу и благочестию дарующая.
Радуйся, Мати Божия, Предстательнице и Заступнице наша усердная.

Кондак 5
Яко Боготечную звезду узреша людие икону Твою, Безневестная Дево, и яко многосветлый светильник поставиша ю во святем соборнем храме, радующеся и вопиюще Богу: Аллилуиа.

Икос 5
Видевше жителие града Городца образ Твой, Владычице, во храме града Костромы стоящий, и на руку Твоею держима Богомладенца Иисуса, скорбию одержими беша: зане отшествие его бысть из града их. Мы же, обрадовани благоволением Твоим ко граду нашему, приносим Ти дары, и с любовию лобызающе Твой святый образ, вопием Ти:
Радуйся, Звездо, Солнце правды нам явльшая;
Pадуйся, возлюбившая сию страну.
Радуйся, обретение Тебе ищущих;
Pадуйся, радостию неизреченною верных сердца исполняющая.
Радуйся, сокровище благодати неистощимое;
Pадуйся, милости приснотекущий источниче.
Радуйся, от тяжких бед спасающая;
Pадуйся, от смертоносныя язвы избавляющая.
Радуйся, всего мира Ходатаице;
Pадуйся, всех недугов Целительнице.
Радуйся, красото несравненная;
Pадуйся, доброто несказанная.
Радуйся, Мати Божия, Предстательнице и Заступнице наша усердная.

Кондак 6
Проповедницы Богоноснии быша видевшии образ Твой, Богородице. Возвращся бо кийждо во страну свою, возвещаше о пришествии его и чудесех от него бываемых, воспевая Богу: Аллилуиа.

Икос 6
Возсиявша благодать от чуднаго образа Твоего, Чистая, веру немощствующих утверди, верных же возвесели сердца любовию. Сего ради радующеся вопием Ти:
Радуйся, Пресвятая Дево, светом небесныя истины нас озаряющая;
Pадуйся, мглу греховную от нас отгоняющая.
Радуйся, чудесы Твоими к Боговедению нас приводящая;
Pадуйся, всех кающихся грешников ко благочестию подвизающая.
Радуйся, всех притекающих к Тебе крепкое заступление;
Pадуйся, немощствующих умом утверждение.
Радуйся, изнемогающих в вере возставляющая;
Pадуйся, тихое пристанище в море житейстем обуреваемым.
Радуйся, злыя советы сынов погибельных открывающая;
Pадуйся, вознесенную гордыню врагов Отечества нашего смиряющая.
Радуйся, православных царей Державо;
Pадуйся, всех христиан Похвало.
Радуйся, Мати Божия, Предстательнице и Заступнице наша усердная.

Кондак 7
Хотя прославити Сын Твой, Богородице, святую икону Твою во граде Костроме, повеле ю в день Успения Твоего святому великомученику Феодору Стратилату носити по граду сему, да вси видяще чудо сие благодарным сердцем возопиют Ему: Аллилуиа.

Икос 7
Чудо новое яви нам Господь мольбами Твоими, Богородице, егда сгоревшу храму, в немже бе поставлен святый образ Твой, сохрани его в пепле невредима от огня, и тако мневших сгоревша его печаль в радость преложи. Мы же, чудо сие ведяще, воспеваем Ти таковая:
Радуйся, Купино Неопалимая;
Pадуйся, огненный столпе, сущия во тьме наставляяй.
Радуйся, кивоте, Духом позлащенный, невместимаго Бога вместивший;
Pадуйся, кадильнице златая, яко фимиам благоуханный, молитвы Твоя за ны к Богу Сыну присно возносящая.
Радуйся, жезле Ааронов к явлению в мире Сына Твоего прозябший;
Pадуйся, руно Гедеоново, благодатию Божиею во спасение наше орошенное.
Радуйся, горо несекомая, от неяже отсечеся краеугольный Камень Христос;
Pадуйся, Храме одушевленный, в немже вселися Божество телесне.
Радуйся, девства охранение;
Pадуйся, супружества благословение.
Радуйся, паче всех Господа возлюбившая;
Pадуйся, паче всех от Него превознесенная.
Радуйся, Мати Божия, Предстательнице и Заступнице наша усердная.

Кондак 8
Странное чудо видевше, на воздусе икону Богоматере стоящу, аки руками Ангельскими держиму, егда второе сгоре храм, в немже стояше явленная сия икона, отвержемся, людие, мира сего, ум на Небеса преложше: сего бо ради и дадеся нам чудная икона Богородицы, да взирающе на ню горняя мудрствуем, а не земная, вопиюще к Богу: Аллилуиа.

Икос 8
В вышних пребывающи селениих, и нижних не разлучалася еси, Богородице, чудесы Твоими всех просвещающи приходящих к Тебе с верою; сего ради и слышиши от нас сия:
Радуйся, Мати Христа Бога нашего, на Небеси пребывающая;
Pадуйся, на земли нас не оставляющая.
Радуйся, ради величества Твоего на Небеси Ангелы окруженная;
Pадуйся, ради славы Твоея на земли от человек прославляемая.
Радуйся, Тебе бо служат вся небесныя силы;
Pадуйся, Тебе бо, по Бозе, хваление возносят Херувими и Серафими.
Радуйся, лице Божие выну на Небеси созерцающая;
Pадуйся, пред престолом Сына Твоего Матерния руце Твои за ны молящися простирающая.
Радуйся, нас, сущих на земли, от всякаго зла омофором Твоим покрывающая;
Pадуйся, верных от всяких душепагубных дел удаляющая.
Радуйся, рождением Сына Божия двери Царства Христова нам отверзшая;
Pадуйся, надеждою приятия небесных благ верных души услаждающая.
Радуйся, Мати Божия, Предстательнице и Заступнице наша усердная.

Кондак 9
Всякое естество ангельское превозносит Тя, Дево, Великия ради любве Твоея к роду христианскому: незрима бо и неприступна, яко Мати Бога от земли к Небеси возшедшая, Пречистым Твоим образом зриму и приступну Себе являеши всем воспевающим Сыну Твоему: Аллилуиа.

Икос 9
Ветия многовещанныя, яко рыбы безгласны зрим о Тебе, Богородице: недоумевают бо глаголати о славных чудесех, от явленныя Твоея иконы бываемых. Мы, же оным дивящеся, благодарно вопием Ти:
Радуйся, слепых прозрение;
Pадуйся, хромых хождение.
Радуйся, от темных и лукавых духов исцеляющая;
Pадуйся, лучами, от Твоего Пречистаго образа изшедшими, врагов земли нашея отгнавшая.
Радуйся, больным видение Твое даровавшая;
Pадуйся, молящимся явленней иконе Твоей исцеление подающая.
Радуйся, разслабленных от одра болезни воздвигающая;
Pадуйся, немым разрешающая уста.
Радуйся, от плена вражия возвращающая;
Pадуйся, лютыя плоти страсти утоляющая.
Радуйся, души верных неизреченным милосердием Твоим умиляющая;
Pадуйся, неизглаголанным Твоим человеколюбием унывающих ободряющая.
Радуйся, Мати Божия, Предстательнице и Заступнице наша усердная.

Кондак 10
Соблюсти хотящи в чистоте домостроительство Церкве Православныя, Чистая, и утвердити скипетр Державы Российския, чудною иконою Твоею вложила еси в сердце благовернаго государя Михаила Феодоровича прияти венец царский земли Российския, да вси видящии видят, яко Вышний владеет царством, и емуже хощет дает е, и возопит Ему: Аллилуиа.

Икос 10
Стена еси необоримая, Богородице Дево, всем к Тебе прибегающим: никтоже бо притекаяй к Тебе тощ отходит. Сего ради ущедряеми милостию Твоею, во умилении души возглашаем Тебе:
Радуйся, твердая стено, от враг видимых и невидимых охраняющая;
Pадуйся, крепкая защито, упование на Тя возложившим.
Радуйся, познания истины чистое зерцало;
Pадуйся, сохранения веры крепкое забрало.
Радуйся, грады и страны христианския предстательством Твоим от врагов спасающая;
Pадуйся, царем благоверным поборающая.
Радуйся, мир во градех селящая;
Pадуйся, благонравным благопоспешающая.
Радуйся, силою молитв Твоих злыя помыслы в ничтоже обращающая;
Pадуйся, силы врагов ближняго сокрушающая.
Радуйся, юности наставление;
Pадуйся, старости поддержание.
Радуйся, Мати Божия, Предстательнице и Заступнице наша усердная.

Кондак 11
Пение всякое побеждается, спростретися тщащееся множеству многих щедрот Твоих; равночисленныя бо песку морскому песни аще приносим Ти, Богородице Дево, ничтоже совершаем достойно, яже даровала еси нам вопиющим к Богу: Аллилуиа.

Икос 11
Светоприемную свещу, древле Явльшуюся, зрим во святей иконе Твоей, Богородице Дево, егда град наш защитила еси от разорения врагов земли нашея лучами, от святыя Твоея иконы исходящими. Сего ради с верою припадающе к ней и с любовию лобызающе ю, вопием Ти:
Радуйся, Мати, Превечнаго Света Христа, учением Его души просвещающая;
Pадуйся, благодатию Божиею неверующих к вере в Бога приводящая.
Радуйся, путешествующим спутешествующая;
Pадуйся, нуждно плавающих Кормчая.
Радуйся, от всякия скорби, гнева и нужды спасающая;
Pадуйся, от глада, губительства, труса и огня сохраняющая.
Радуйся, избавляющая от иноплеменных;
Pадуйся, охраняющая от междоусобныя брани.
Радуйся, в святей иконе Твоей, яко солнце, в костромских пределех возсиявшая;
Pадуйся, зде отрасль царственную возвеличившая.
Радуйся, Тобою бо утверждаются царства;
Pадуйся, Тобою бо венчаются царие.
Радуйся, Мати Божия, Предстательнице и Заступнице наша усердная.

Кондак 12
Благодать приявшая от Бога, Сына Твоего, Дево Богородице, и ту древле излиявшая на всех прибегающих к образу Твоему, не лиши ныне и нас богатыя Твоея милости, даруй нам покаяние о гресех, да чистым сердцем и устны взываем к возлюбленному Сыну Твоему и Богу нашему: Аллилуиа.

Икос 12
Поюще Твоя милости и чудеса, хвалим Тя вси, Богородице, и яко древлий Израиль к кивоту Завета притекаем ко образу лица Твоего, и из глубины души вопием: воздвигни руце Твоя к Сыну Твоему, да подаст нам вся благая и спасительная с верою и любовию вопиющим Ти:
Радуйся, утешение наше в скорбех;
Pадуйся, утоление печалей наших.
Радуйся, радосте наша безконечная;
Pадуйся, светлосте и отрадо сердечная.
Радуйся, надеждо наша крепкая;
Pадуйся, сирым приятелище.
Радуйся, странным прибежище;
Pадуйся, обидимым покровительнице.
Радуйся, оклеветаемых оправдание;
Pадуйся, благих защищение.
Радуйся, тела моего врачевание;
Pадуйся, души моея спасение.
Радуйся, Мати Божия, Предстательнице и Заступнице наша усердная.

Кондак 13
О Премилосердая Заступнице наша, Великия ради милости Твоея даровавшая Отечеству и граду нашему чудотворную икону Твою во освящение, утешение и ограждение наше, нынешнее приемши славословие, от всякаго злаго обстояния избави нас, рабы Твоя, даруй нам здравие и пасение, на враги победу и одоление, и всех нас вечных мук свободи, устнами, душею же и сердцем вопиющих: Аллилуиа.
Этот кондак читается трижды, затем икос 1-й и кондак 1-й

Молитва Пресвятой Богородице перед Ея иконой, именуемой «Феодоровская»
О Пресвятая Владычице Богородице и Приснодево Марие, единая надеждо нам грешным, к Тебе прибегаем и Тебе молим, яко велие имаши дерзновение пред рождшимся от Тебе по плоти Господем Богом и Спасителем нашим Иисусом Христом. Не презри слез наших, не возгнушайся воздыханий наших, не отрини скорби нашея, не посрами упования нашего на Тя, но Матерними молениями Твоими умоли Господа Бога, да сподобит нас, грешных и недостойных, свободитися от грехов и страстей, душевных и телесных, умрети миру и жити Ему Единому по вся дни живота нашего. О Пресвятая Владычице Богородице, путешествующим спутешествуй и ограждай и охраняй оныя, избави плененных от пленения, свободи страждущих от бед, утеши сущих в печали, скорбех и напастех, облегчи нищету и всяко злострадание телесное, и даруй всем вся потребная к животу, благочестию и жизни временней. Спаси, Владычице, вся страны и грады и сию страну и сей град, имже сия чудотворная и святая икона Твоя дадеся во утешение и ограждение, избави я от глада, губительства, труса, потопа, огня, меча, нашествия иноплеменных, междоусобныя брани, и отврати всякий гнев, на ны праведно движимый. Даруй нам время на покаяние и обращение, избави нас от внезапныя смерти, и во время исхода нашего предстани нам явльшися, Дево Богородице, и избави нас от воздушных мытарств, князей века сего, сподоби на Страшнем судищи Христовом стати одесную и соделай нас снаследники вечных благ, да славим во веки великолепое имя Сына Твоего и Бога нашего со Безначальным Его Отцем и Святым, Благим и Животворящим Его Духом, ныне и присно, и во веки веков. Аминь.

Молитва иная
О Премилосердая Госпоже Царице Богородице, приими смиренное моление наше и не отрини нас, заступление и прибежище наше, и не возгнушайся нас, недостойных, но яко милосердая, не престани молящи, Егоже родила еси, да дарует нам прощение многих согрешений наших, да спасет нас имиже весть судьбами. Помилуй нас, Владычице, помилуй нас, несть бо нам спасения от дел. Темже верно вопием Ти: помилуй рабы Твоя, и неплодное сердце наше покажи плодоносно благих дел. Призри на нас, недостойных. Ты бо упование и покров наш, жизнь и свет сердцу нашему. Яко Невечерний Свет от чрева Твоего воздвигшая, озари душу нашу, Чистая, и отжени всяку мглу сердца нашего. Даруй нам умиление, покаяние и сокрушение сердечное. Сподоби нас по вся дни живота нашего творити волю Сына Твоего и Бога нашего и во всем благоугождати Ему Единому. О Богомати, не престани молящи Рождшагося от Тебе за вся притекающия с верою к сему чудотворному образу Твоему и подавай им скорую помощь и утешение в скорбех и напастех, и злостраданиих, избави их от клеветы и злобы человеческия, от враг видимых и невидимых, и всякия нужды и печали. Спаси Отечество наше, град сей и вся грады и страны от всяких бед и нужд, и сотвори милостива нам быти Бога нашего, отврати всякий гнев Его, на ны движимый, и избави ны от належащаго и праведнаго Его прещения. О Боголюбивая Владычице, Ангелов украшение, мучеников слава и всех святых радосте, с ними моли Господа, да сподобит нас в покаянии скончати живота нашего течение. В смерти же час, Пресвятая Дево, избави нас от власти бесовския и осуждения, и ответа, и страшного испытания, и мытарств горьких, и огня вечнаго, да, сподобльшеся славнаго Царствия Божия, величаем Тя и славим воплощшагося от Тебе Христа Бога нашего, Емуже слава со Отцем и Святым Духом, ныне и присно, и во веки веков. Аминь.

Молитва третья
К кому воззову, Владычице; к кому прибегну в печали моей; к кому привнесу слезы и воздыхания моя, аще не к Тебе, Царице Небесе и земли. Кто исторгнет мя из тины грехов и беззаконий, аще не Ты, о Мати Живота, Заступнице и Прибежище рода человеческаго. Услыши стенание мое, утеши мя и помилуй в горести моей, защити в бедах и напастех, избави от озлоблений и скорбей и всяких недугов и болезней, от враг видимых и невидимых, умири вражду стужающих мне, да избавлен буду от клеветы и злобы человеческия; такождь от своея ми плоти гнусных обычаев свободи мя. Укрый мя под сению милости Твоя, да обрящу покой и радость и от грехов очищение. Твоему Матернему заступлению себе вручаю: буди мне Мати и Надежда, Покров и Помощь и Заступление, радость и утешение и скорая во всем Помощница. О, чудная Владычице! Всяк притекаяй к Тебе, без Твоея всесильныя помощи не отходит: сего ради и аз недостойный к Тебе прибегаю, да избавлен буду от внезапныя и лютыя смерти, скрежета зубнаго и вечнаго мучения. Небесное же Царствие получити сподоблюся и Тебе во умилении сердца реку: радуйся, Мати Божия, Предстательнице и Заступнице наша усердная, во веки веков. Аминь.

Тропарь Пресвятой Богородице перед Ея иконой, именуемой «Феодоровская»
Тропарь, глас 4:
Присшествием честныя твоея иконы, Богоотроковице, обрадованный днесь богохранимый град Кострома, якоже древний Израиль к кивоту завета, притекает к изображению лица Твоего и воплотившагося от Тебе Бога нашего, да Твоим матерним к Нему предстательством присно ходатайствуеши всем, под сень крова Твоего прибегающим, мир и велию милость.

Тропарь, глас 4:
Днесь светло красуется преименитый град Кострома и вся Русская страна, созывающи к веселию вся боголюбивыя народы христианския, на преславное торжество Божия Матере, пришествия ради чудотворнаго Ея и многоцелебнаго образа, днесь бо явися нам пресветлое великое солнце, приидите, вси Богоизбраннии людие, новый Израиль, ко источнику цельбоносному, источает бо нам неоскудныя милости Пресвятая Богородица и избавляет вся грады и страны христианския невредимы от всех навет вражиих. Но, о Всемилостивая Госпоже, Дево Богородице, Владычице, спаси страну нашу, и архиереи, и вся люди Твоего достояния от всех бед по велицей Твоей милости, да зовем Ти: радуйся, Дево, христианом похвало.

Кондак, глас 8:
Притецем, людие, вси к тихому и доброму пристанищу, в дом Божия Матере, чудному образу Царицы и Богородицы, за неизреченную милость Ея явленному, верно припадающе и вопиюще: о Всемилостивая Владычице, за спасительное Твое смотрение, чуднаго образа к нам пришествие, посети нас, грешных, светло сотворяющих празднество Твое, укрепи страну нашу, дивно на враги победу подающи, и веру утверди. Церковь Сына Твоего непоколебиму соблюди, притекающих к Тебе спаси, от всяких напастей избави, сохраняющи в мире все Православие, да зовем Ти: радуйся, Невесто Неневестная.

Ин кондак, глас 8:
Благодарственная приносяще Ти раби Твои, Богородительнице, о всех, имиже благодеяла еси граду нашему, из глубины души взываем к Тебе и мили ся деем, не престани, Владычице, Матерними к Сыну Твоему и Богу нашему молитвами подавати вся благая и спасительная всем, верою и любовию вопиющим Ти: радуйся, Дево, христиан похвало.

Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем с верою притекающим.