Кондак 1
Избранней от всех родов Владычице мира, превыше сил небесных превознесенней, хвалебныя песни приносим раби Твои, Богородице; Ты же, яко имущая милосердие неизреченное, во святей иконе Твоей являемое, от всяких нас бед свободи, да с радостию зовем Ти:
Радуйся, земли Холмския отрадо и всему миру прибежище и утешение.

Икос 1
Ангелов чиноначалия на небеси величают Тя, Пресвятую Деву, Радость пресветлую всему миру рождшую, мы же, песни ангельстей подражающе, зде на земли воспоем Ти сицевая:
Радуйся, богоизбранная Отроковице;
Pадуйся, от дней ветхих Богу предобрученная.
Радуйся, от пророк миру предуказанная;
Pадуйся, архангелом Гавриилом о зачатии Сына от Духа Свята предвозвещенная.
Радуйся, во смирении благовестие архангелово восприявшая;
Pадуйся, наставнице, смиренномудрию нас научающая.
Радуйся, богодухновенно от праведныя Елисаветы Матерь Божия нареченная;
Pадуйся, о рождении от Тебе Спасителя мира в веселии духовнем Господа возвеличившая.
Радуйся, лики ангельскими песнословимая;
Pадуйся, от всех родов присно ублажаемая.
Радуйся, земли Холмския отрадо и всему миру прибежище и утешение.

Кондак 2
Видяще заступление Твое, всеблагая Владычице, роду христианскому являемое, зане в бедах крепкая еси нам помощница, обидимым заступница, скорбным утешение, больным исцеление и всем труждающимся скорая помощница, вси благодарственно о Тебе Богу вопием: Аллилуия.

Икос 2
Разум подаждь нам, всеблагая Владычице, како достойно воспети промышление Твое, стране Холмстей явленное, внегда просветитель Руси князь Владимир изволением Твоим в покров и охранение страны сея, светом учения евангельскаго просвещаемыя, граду Холму в дар принесе икону Твою, Пречистая. Мы же, дивящеся Твоему о нас предстательству со умилением зовем Ти сице:
Радуйся, усердная заступнице рода христианскаго;
Pадуйся, насадителю веры Христовы князю Владимиру во апостольстве вспомоществовавшая.
Радуйся, иконою Твоею чудотворною страну Холмскую, аки драгоценным даром, обогатившая;
Pадуйся, веру православную в земли сей укрепившая.
Радуйся, Твоею неисчетною благостию христиан ущедряющая;
Pадуйся, милосердие неизреченное душам нашим источающая.
Радуйся, молитвами Твоими о нас не оскудевающая;
Pадуйся, Матерним заступлением чтущих Тя от всех бед избавляющая.
Радуйся, пречестною иконою Твоею врачевство телесное и духовное Христианом являющая;
Pадуйся, высото непостижимая, ко пристанищу нашему нас возводящая.
Радуйся, земли Холмския отрадо и всему миру прибежище и утешение.

Кондак 3
Силу благодатную явила еси во святей иконе Твоей, Пресвятая Владычице, сокровище бо многоценное в ней нам открываеши и безчисленныя щедроты притекающим к ней подаеши, да вси, щедротами Твоими обогатившеся, со умилением Богу воззовем: Аллилуия.

Икос 3
Имущи о новопросвещенных людех земли Холмския попечение неоскудное, от пречестныя иконы Твоея токи чудес источила еси, Владычице, да вси познают, яко любовь Твоя и попечение присно на людех православных пребывают. Сего ради благодарственно Тебе поем:
Радуйся, благодати источник неистощимый дарующая;
Pадуйся, лучами чудес всех притекающих к иконе Твоей озаряющая.
Радуйся, помоще всем верно чтущим Сына Твоего преславная;
Pадуйся, веры православныя в земле нашей крепосте твердая.
Радуйся, попечением Твоим присным о людех православных истину Православия утверждающая;
Pадуйся, иконою Твоею радость духовную нам содевающая.
Радуйся, милости сокровище многоценное нам открывающая;
Pадуйся, море щедрот просящим у Тебе изливающая.
Радуйся, заблуждшим путь истины указующая;
Pадуйся, призывающим Тя на помощь скоропоспешествующая.
Радуйся, земли Холмския отрадо и всему миру прибежище и утешение.

Кондак 4
Буря напастей и бед, не единожды воздвизаемая противу веры православныя в земли нашей, не возможе поколебати твердости в вере всех притекающих к Тебе, Владычице, и цельбоносней иконе Твоей покланяющихся, зане икона сия и щит, и победное знамение православным христианом Тобою дадеся и мы грешнии твердо уповаем, яко и во дни наших напастей скоро послушаеши всех нас, с верою ко Твоему пречистому образу притекающих и Сыну Твоему поющих: Аллилуия.

Икос 4
Слышавше людие православнии, яко икона Твоя пречистая во дни тыя, егда град Холм от агарян нечестивых огню и мечу предадеся, под пепелом храма бысть сокровенна и по ста летех паки невредима обретеся, радостию велиею возрадовашася, хвалу Ти, Пресвятая Дево и Мати, воспевше таковую:
Радуйся, земли Холмския покрове;
Pадуйся, Православия в ней насаждение и утверждение.
Радуйся, во огни икону Твою пречестную чудесно неврежденну сохранившая;
Pадуйся, росою чудоточною огнь угасившая.
Радуйся, радость нам велию, яко отроком халдейским в пещи огненней, подавшая;
Pадуйся, сильну в чудотворении познати Тя научившая.
Радуйся, яко икону Твою неврежденну зряще, святыне сей покланятися научаемся;
Pадуйся, яко от иконы Твоея даров чудесных сподобляемся.
Радуйся, броне наша неуязвимая;
Pадуйся, стено наша несокрушимая.
Радуйся, земли Холмския отрадо и всему миру прибежище и утешение.

Кондак 5
Боготечная звезда явися нам, Богомати, пречестная икона Твоя, лучами бо чудес, от иконы исходящей, всех верных Ти осияваеши, мрак греховный и мглу скорбей наших прогоняеши и всех ищущих спасения наставляеши с верою воспевати Богу: Аллилуия.

Икос 5
Видев князь Владимир, яко насельницы земли Холмския во тьме язычества и сени смертней пребывают, разори на горе града Холма капище идольское и созда на ней храм Богу Живу, в немже и утверди пречестныя образ Твой, Богомати, да вси взирающии нань и чтущии Тя дары от Тебе восприемлют, яже к животу и благочестию. Мы же, чтуще святыню Твою, со умилением глаголем:
Радуйся, палато Сына Божия, в храме земнем обитати благоизволившая;
Pадуйся, вместилище славы Господней, притекающих к Тебе славою и честию венчавшая.
Радуйся, горо несекомая, источник воды живы жаждущим источившая;
Pадуйся, заре, блистающая во тьме, мрак языческий в земли нашей разорившая.
Радуйся, стамно златая, мир весь глада духовнаго избавляющая;
Pадуйся, столпе огненный, к Солнцу правды всех ищущих спасения приводяй.
Радуйся, иконою Твоею источники чудес нам источающая;
Pадуйся, двери райския всем верно чтущим Тя отверзающая.
Радуйся, христианом радосте и утешение;
Pадуйся, уз греховных падшим разрешение.
Радуйся, земли Холмския отрадо и всему миру прибежище и утешение.

Кондак 6
Проповедницы чудес великих, иконою Твоею источаемых, явишася не токмо православнии, но и иновернии людие; не отринула бо еси милосердием Твоим и сих, к Тебе притекающих и цельбоносной иконе Твоей поклоняющихся, да вси сильну помощницу Тя уразумевше и поклонятися православней святыне научившеся, со умилением воззовут Богу: Аллилуия.

Икос 6
Возсиявши от пречестныя иконы Твоея благодать светозарную, светиши светом чудес и милостей стране нашей, Пречистая, и вси с верою к Твоей иконе цельбоносней притекающии и чающий от Тебе великия и богатыя милости, единеми усты и единем сердцем велегласно Тебе вопиют:
Радуйся, дерзновенная к Богу ходатаице;
Pадуйся, за мир христианский теплая молитвеннице.
Радуйся, неистощимый источниче святыя;
Pадуйся, многотекущая реко благ вечных.
Радуйся, сиянием славы Твоей нас облистающая;
Pадуйся, мрак греховный душ наших упраздняющая.
Радуйся, яко Твоею иконою источники чудес являеши;
Pадуйся, яко прибегающим к ней вся полезная даруеши.
Радуйся, сердец наших умиление;
Pадуйся, от бед и напастей наше спасение.
Радуйся, земли Холмския отрадо и всему миру прибежище и утешение.

Кондак 7
Хотящи граду Холму, от агарян нечестивых разоряему милосердие явити, не отринула еси, Скоропослушнице, двух дев холмских, пред иконою Твоею о спасении града сего молящихся и чин иноческий прияти обещавших, но притекла еси на помощь граду сему и обратила в бегство полки вражия, да вси спасеннии Тобою от бед воспоют: Аллилуия.

Икос 7
Дивное попечение о доме Господнем, в немже пребываеши Твоя цельбоносная икона, показала еси, Пресвятая Владычице; како убо не дивимся Твоей чудесней помощи, собирателю лепты на расширение храма сего иноку Иоасафу явленней, егда инок сей от Тебе, во образе лепообразныя Жены явльшияся, прият в дар свиток с лептою, на сие дело довлеющею, и, дивяся свыше ниспосланнеи помощи, воспе Ти сице:
Радуйся, преславная в бедах заступнице;
Pадуйся, милости превеликия подательнице.
Радуйся, многажды прошения наша предваряющая;
Pадуйся, светозарное сияние, скорбный мрак души нашея разгоняющее.
Радуйся, ненадежных непостыдное надеяние;
Pадуйся, всем верно чтущим Тя радосте и утешение.
Радуйся, любве неистощимый источниче;
Pадуйся, твердое наше упование.
Радуйся, всех притекающих к Тебе Твоею милостию покрывающая;
Pадуйся, вечныя радости нас сподобляющая.
Радуйся, земли Холмския отрадо и всему миру прибежище и утешение.

Кондак 8
Странники и пришельцы на земли суще, новаго града, Иерусалима небеснаго, взыскуем. Ты же, Пречистая Владычице, яко предстательница о людех к Сыну Твоему, моли прощение прегрешений нам прежде конца даровати, да тихаго пристанища на небеси достигнем и Богови возопием: Аллилуия.

Икос 8
Вся небесныя силы Тебе, яко Богоматерь, величают, Tы же, Дево Богородице, честнейшая херувим и славнейшая без сравнения серафим, не возгнушалася еси за род человеческий, грехми оскверненный, предстояти; сего ради и вси земнороднии благодарственная Тебе приносят, воспевающе сице:
Радуйся, Невместимаго вместилище;
Pадуйся, чистоты божественныя хранилище.
Радуйся, рождением Твоим Бога со человеки соединившая;
Pадуйся, спасение человеком устроившая.
Радуйся, путеводительнице, к небеси нас возводящая;
Pадуйся, Царице небесе и земли, врата райская нам отверзающая.
Радуйся, с Сыном Твоим и Богом соцарствующая;
Pадуйся, и посреде нас, грешных, пребывати не возгнушавшаяся.
Радуйся, ко благосердию Владыки молитвы в вере благочестивых приносящая;
Pадуйся, молений и нас грешных не отвергающая.
Радуйся, земли Холмския отрадо и всему миру прибежище и утешение.

Кондак 9
Все естество ангельское и человеческое, дивящеся Твоему неизреченному милосердию к роду христианскому, похвальныя песни Тебе приносят, зане сильным предстательством Твоим мир весь от бед избавляеши, больных врачуеши, грешных заступаеши и молишися о всех, с верою к Богу притекающих и вопиющих Ему: Аллилуия.

Икос 9
Ветии многовещаннии недоумеют, киими словесы восхвалити славный, Владычице, праздник Холмския иконы Твоея, к нейже в день сей святый во множестве превеликом не токмо православнии, но и иновернии притекают, чающе от Тебе скорбей избавления, недугов исцеления, радостей исполнения и благ вечных сподобления. Ты же, Щедродательнице, неисчетная благодеяния иконою Твоею в день сей являеши, да вси, радующеся о Тебе, возглаголют сице:
Радуйся, мир от скорбей избавляющая;
Pадуйся, в напастех нас защищающая.
Радуйся, слепых прозрение, глухих слышание;
Pадуйся, хромых хождение, немых глаголание.
Радуйся, болезней наших врачевание;
Pадуйся, чаяний наших исполнение.
Радуйся, умерщвленных грехми благодатию Твоею оживляющая;
Pадуйся, подаяние благ вечных нам являющая.
Радуйся, тихое пристанище ищущим спасения;
Pадуйся, почитающим икону Твою несумненное защищение.
Радуйся, земли Холмския отрадо и всему миру прибежище и утешение.

Кондак 10
Спасти хотящи некоего мужа холмска Иакова, в реце утопающа и ко Твоей помощи взывающа, Ты, Богомати, отчаявшихся спасение, подобно Христу, извлекшему Петра из пучины морския, простерла еси руку помощи сему погибающему, да вси сущии в бедах, ведяще чудо сие, воспоют о Тебе песнь Богови: Аллилуия.

Икос 10
Стена еси нерушимая граду Холму, Пресвятая Богородице Дево, егда бо во дни древния агаряне нечестивии, огню и мечу землю Холмскую предающе, ко граду Холму приближахуся, насельницы града, подъявше икону Твою пречестную, вокруг храма ю обношаху и о спасении града слезно моляхуся. Tы же, внимающи мольбам людей, во спасении отчаявшихся, устрашила еси враги видением чудным и отгнала их от града, ими осажденнаго, да вси спасеннии Тобою от находящих на ня бед воспоют Ти таковая:
Радуйся, страну нашу от нашествия агарянскаго свободившая;
Pадуйся, чудесным видением стены неприступныя враги устрашившая.
Радуйся, сильным заступлением Твоим от всяких нас бед свобождающая;
Pадуйся, от огня, меча и нашествия иноплеменников нас избавляющая.
Радуйся, во бранех крепкая помощнице;
Pадуйся, отчаявшихся нечаянная радосте.
Радуйся, от смертнаго губительства наше спасение;
Pадуйся, врагов наших явное посрамление.
Радуйся, в бедах изнемогающим незыблемое укрепление;
Pадуйся, во страданиих наших благомощное утешение.
Радуйся, земли Холмския отрадо и всему миру прибежище и утешение.

Кондак 11
Пение всеумиленное приносят Ти вси труждающиися и обремененнии, зане, Сыну Твоему непрестанно предстоящи, молишися, да слово, Им реченное: «Аз упокою вы», соблюдет и вся в лишении сущия к небесному веселию приведет, вси же дар сей небесный восприявшии воспоют Ему хвалебную песнь: Аллилуия.

Икос 11
Светозарною лучею благодатнаго упования явися православным христианом пречестная икона Твоя, Владычице, во дни скорби их, егда бо страна Холмская от Православия лестию отторжена бысть, людие православнии, в напасти сей сущии, молящеся пред иконою Твоею, велие утешение и светлую радость обретаху в надежде утверждающеся, яко привременни суть дние сии лукавии. Егда же чаяние сие исполнися, людие с веселием воспеша Ти хвалу таковую:
Радуйся, душевредных учений обличение;
Pадуйся, душеполезных знаний дарование.
Радуйся, священное прибежище наше и верных ограждение;
Pадуйся, погибших взыскание и заблуждших исправление.
Радуйся, домостроительнице нашего спасения, житие наше добре устрояющая;
Pадуйся, во страданиих утешение и в житии благодатное укрепление нам подавающая.
Радуйся, яко Тебе ради православнии людие прельщения еретическая отметают;
Pадуйся, яко Тобою и от еретик совращеннии паки православную веру обретают.
Радуйся, Церкве Христовы пресветлое украшение;
Pадуйся, Православия в стране нашей незыблемое утверждение.
Радуйся, земли Холмския отрадо и всему миру прибежище и утешение.

Кондак 12
Благодати Твоея не лиши нас, Пренепорочная, люте бо страждем от беззаконий наших и не имамы иныя надежды оправдитися, разве Тебе, Владычице. Tы нам помози, да не погибнем люте, и приими нас в небесныя кровы, да, радующеся, о Тебе возопием Богу: Аллилуия.

Икос 12
Поюще Тя, яко неоскудевающую милосердием Предстательницу нашу пред Господом, веруем и исповедуем, яко испросиши нам благая не токмо в житии сем привременнем, но и по смерти нашей, да небесных благ не лишившеся, воспоим Ти сицевая:
Радуйся, в бездне греховней пребывающим очищение;
Pадуйся, грешников с Богом примирение.
Радуйся, молитвами Твоими Матерними милость и всепрощение грешником у Сына Твоего испрошающая;
Pадуйся, молитвами Твоими праведно движимый на нас гнев Божий отвращающая.
Радуйся, отрадо наша и утешение в день смерти;
Pадуйся, надеждо наша и по смерти.
Радуйся, уповающим на Тя непостыдную кончину живота дарующая;
Pадуйся, в День судный десное стояние нам устрояющая.
Радуйся, ключу царствия Христова, врата небесная нам отверзающая;
Pадуйся, двере райская, в чертог небесный нас возводящая.
Радуйся, земли Холмския отрадо и всему миру прибежище и утешение.

Кондак 13
О всепетая Мати, Царице неба и земли, ко Твоему пречистому образу прибегаем и, поклоняющеся ему, умильно глаголем: покрый нас кровом милосердия Твоего, избави нас от всяких бед, скорбей и напастей и умоли Сына Твоего в день праведнаго Суда Божия сподобити нас деснаго стояния со всеми святыми, да непрестанно поем Ему: Аллилуия.
Этот кондак читается трижды, затем 1-й икос и 1-й кондак

Молитва
О Пресвятая Дево Мати Христа Бога нашего, всемощная заступнице страны нашея! Со страхом, верою и любовию припадающе к чудотворному образу Твоему, молитвенно взываем: буди милосерда к нам, смиренным и недостойным рабом Твоим, и грехов и беззаконий наших, Благая, не помяни, но простри руце Твои ко благосердию Владыки, да не отвратит лица Своего от рабов Своих и не осудит нас грешных по беззаконием нашим, но сотворит с нами по велицей Своей милости. Ей, Госпоже Владычице! Буди путеводительница в житии нашем: светом истины умы наша просвети, сердца умягчи, веру укрепи, надежду утверди, дара любве сподоби. Умилосердися, всемилостивая Госпоже наша, на немощныя люди Твоя: заблуждшия на путь правды настави, колеблемыя в вере вразуми, отпадшия от благочестивыя веры отеческия возврати и вся истинному пути научи. Спаси милостию Твоею и помилуй благоверныя люди Твоя, епископство православное и весь чин церковный. Не отрини такожде милосердием Твоим и приими под кров Твой и вся правители страны нашея, вразуми и настави их право правити, законы божественныя соблюдающе. Нас же в мире и любви друг ко другу утверди, да вси, в единении друг со другом пребывающе, тихое и безмятежное житие поживем и, дарми благ земных насладившеся, благ небесных милосердия ради Божественнаго не лишимся. Еще молимся Тебе, Владычице Богородице, избави нас от глада, губительства, землетрясения, потопа, огня, меча, нападения вражия, междоусобныя брани, наглыя смерти, тлетворных болезней и всяких ны зол окружающих. Вонми и услыши, всемилостивая Госпоже, всех нас, ныне к иконе Твоей святей припадающих и со слезами к милосердию Твоему взывающих, утоли наша печали и буди нам скорая помощница во всех делех наших во веки веков. Аминь.

Тропарь, глас 5:
Яко Материнское благословение, даровала еси, Пречистая Дево, пречудную икону Твою православным отцем нашим на гору Холмскую, тако и ныне, презирающе множество грехопадений наших, не остави нас, о всепетая Мати, но пребуди с нами до скончания века и отверзи нам райския двери.

Кондак, глас 6:
Пресвятей Деве Богородице, дивными иконами Своими, яко звездами, Церковь Православную украсившей и православным людем земли Холмския пречудный образ сей даровавшей, благодарственное воспеваем пение; Ты же, Пречистая, укрепи нас в православней вере, да зовем Ти: Радуйся, Царице небесе и земли и любящая Мати всех с верою чтущих Тя.

Величание
Величаем Тя, Пресвятая Дево, и почитаем честную икону Твою, юже от лет древних во граде Холме прославила еси.