Кондак 1
Взбранной Воеводе Деве Благодатней, яко избавившей нас от всякаго зла греховнаго, благодарственная восписуем Ти, раби Твои непотребнейшии, но яко имущая власть умягчати сердца злыя, от всякаго зла избави сердца наша, да зовем Ти:
Радуйся, Дево Благодатная, сердца наша злыя умягчающая.

Икос 1
Ангели и вся Небесныя силы удивляются Твоему милосердию к роду человеческому, егда даровала еси чудотворную Твою икону Седмистрелеуязвленную на умягчение злых сердец. Мы же, взирая со страхом на икону сию, взываем Ти сице:
Радуйся, Благодатная Дево, сердца злыя, яко воск, умягчающая;
Радуйся, сердца злыя на добро наставляющая.
Радуйся, всякое зло искореняющая;
Радуйся, злыя обычаи уничтожающая.
Радуйся, Дево Благодатная, сердца наша злыя умягчающая.

Кондак 2
Видяще, Благодатная, род человеческий, во зле погибающий, даровала ему Свою икону Седмистрелеуязвленную на умягчение злых сердец, да вси, имеющия сердце злое, взирают на нея и умягчаются сердцем, со страхом и трепетом вопиюще: Аллилуиа.

Икос 2
Разум человеческий не возможет изчести Твоя милости к погибающим во зле, ибо Ты предстоиши пред Престолом Сына Твоего, простирающе к Нему Своя Пречистыя руце за ны, злыя и непотребныя. Мы же, со умилением взываем Ти сице:
Радуйся, отвращающихся от зла, приемлющая;
Радуйся, мир и любовь водворяющая.
Радуйся, любовь вместо зла насаждающая;
Радуйся, злых и нераскаянных отвергающая.
Радуйся, Дево Благодатная, сердца наша злыя умягчающая.

Кондак 3
Сила благодати даровася святей Твоей иконе: умягчати сердца злыя, да имущие сердце озлобленное, взирают на сию со страхом и трепетом, просяще Тя подати умягчение и вопиют Богу: Аллилуиа.

Икос 3
Имуще благодать искореняти все злое и непотребное, да оградит образ Твой род человеческий от зла миром и любовию. Мы же единым сердцем и устнами вопием Благодатней:
Радуйся, погибающим от зла, руку помощи простирающая;
Радуйся, нераскаянных грешников на путь покаяния наставляющая.
Радуйся, злое семя неплодно сотворяющая;
Радуйся, избегающих зла Покровом Своим покрывающая.
Радуйся, во зле живших и покаявшихся, добре исправляющая;
Радуйся, Дево Благодатная, сердца наша злыя умягчающая.

Кондак 4
Бурею греховною покрыся все море житейское, Ты же, Благодатная, видя люди, в нем погибающая, даровала еси им пристанище тихое — святую Твою икону, да взирая на сию со страхом и любовию вопием Богу. Аллилуиа.

Икос 4
Землероднии, слыша велия милости от иконы Твоея бываемыя, не токмо болезни исцеляеши, злыя сердца умягчаеши, яко воск, темже умиляяся сердцем, вопием ти:
Радуйся, род христианский от зла спасающая;
Радуйся, погибающих во злобе, на путь мира наставляющая.
Радуйся, сеятелей зла наказующая;
Радуйся, искоренителей зла любовию Своею озаряющая.
Радуйся, весь мир христианский миром и любовию ограждающая;
Радуйся, Дево Благодатная, сердца наша злыя умягчающая.

Кондак 5
Боготечная звезда, явися нам чудотворная Твоя икона, имуще седмь стрел, в Твое сердце вонзенныя. Мы же, телесными очима взирая на сию, сердцем умягчаемся, устнами же со умилением и страхом вопием: Аллилуиа.

Икос 5
Видевше людие злочестивии святую Твою икону, умягчаются сердцем, исполняются умилением и вопиют Честнейшей Херувим и Славнейшей без сравнения Серафим:
Радуйся, злочестивии людие на путь покаяния приводящая;
Радуйся, любящия мир, сынами Божиими именующая.
Радуйся, всякую вражду искореняющая;
Радуйся, зло диавольское сокрушающая.
Радуйся, растлевающих душу и тело, наказанием вразумляющая;
Радуйся, Дево Благодатная, сердца наша злыя умягчающая.

Кондак 6
Проповедуем Твое милосердие к роду человеческому, возведем очи наша к Тебе, Благодатней. Сердца наша злыя умягчаяй, да не погибнем во зле, но да обрящем благодать от Тебе, взывающи: Аллилуиа.

Икос 6
Возсияла нам благодать, от иконы Твоея исходящая, яко заря многосветлая, да вси, во зле погибающии, просветятся лучами ея, и, взирающи на икону сию, со страхом воззовем сице:
Радуйся, Целительнице наша в болезнех;
Радуйся, Утешительнице наша в печалех.
Радуйся, скорбящих в жизни сей утешающая;
Радуйся, переносящим скорби без ропота, Царство Сына Твоего обещающая.
Радуйся, скорби наша в радость претворяющая;
Радуйся, радостию сердца наша веселящая.
Радуйся, Дево Благодатная, сердца наша злыя умягчающая.

Кондак 7
Хотя спасти род человеческий от злобы диаволи, явила еси нам чудотворную Твою икону на умягчение злых сердец, да вси взирая на сию, отгонят злобу сердца своего, воспевая песнь ангельскую: Аллилуиа.

Икос 7
Hовое дивное знамение даровася иконе Твоей, Благодатная, да умягчает злыя сердца. И, вси взирая на сию, зрим седмь стрел, в сердце Твое вонзенныя, сердцем умиляемся, и вопием Ти таковая:
Радуйся, избавляющая нас от злобы диавола;
Радуйся, козни его поправшая.
Радуйся, в злобе сердца наша не оставившая;
Радуйся, сердца наша умилившая.
Радуйся, во гневе нашем вразумление нам подающая;
Радуйся, заблудших на путь истины наставляющая.
Радуйся, Дево Благодатная, сердца наша злыя умягчающая.

Кондак 8
Странное зрим видение на иконе Твоей, Благодатная, како седмь стрел — грехи наша, яко стрелы, вонзошася в сердце Твое, да молим Тя: отврати гнев Твой от нас, да вси с любовию вопием Ти: Аллилуиа.

Икос 8
Вся в вышних пребываеши, не отступи от нас, землеродных, Благодатная Дево, ибо во зле все житие наше изживше, не остави нас до конца, но умягчи сердца наша к Твоему хвалению:
Радуйся, землеродных милостию Своею не оставившая;
Радуйся, благодатию святых икон весь мир просвещающая.
Радуйся, свет миру родшая;
Радуйся, роду христианскому Благая Предстательнице.
Радуйся, Славимая от ангелы;
Радуйся, Дево Благодатная, сердца наша злыя умягчающая.

Кондак 9
Все естество ангельское удивишася Твоему благоволению к роду человеческому, ибо Ты предстоиши всегда у Престола Сына Твоего, за ны моляся, да не погибнем во зле и беззакониях, но вси получим спасение, вопия Богу: Аллилуиа.

Икос 9
Витии суемудреннии не могут познати велия Твоего промышления о роде человечестем, како людие, жившие во зле и злобе, возмогут получити спасение. Мы же вемы, како Ты, Благодатная, вся можеши, да с веселием зовем Ти:
Радуйся, яко велия Твоя благодать даровася и нам, грешным;
Радуйся, яко утаися благодать Твоя от нечтущих Тя.
Радуйся, яко не оскудеет благодать Твоя на прославляющих Тя;
Радуйся, Ты бо Тихое Пристанище от бурь и злобы.
Радуйся, Ты бо не оставляеши погибающих, просящих с верою Покрова Твоего;
Радуйся, отчаянных Вразумление.
Радуйся, хотящих веровати в Тя, осеняющая;
Радуйся, обращающимся к Тебе за помощию, с любовию помогающая.
Радуйся, Дево Благодатная, сердца наша злыя умягчающая.

Кондак 10
Спасти хотя род наш от злобы и вражды, Господь дарова нам чудотворную икону Матери Своея, да вси очистимся от зла и, покаявшися, войдем на путь правый, имея Тя, Путеводительницу добрую, с веселием поя Богу: Аллилуиа.

Икос 10
Стена еси Крепкая всем ищущим спасения, ибо Создатель всея вселенныя дарова Тебе благодать помогати человеком, во зле погибающим, да обрящут благодать Твою, вопиюще радостно:
Радуйся, пристанище всем ищущим спасения;
Радуйся, не оставляющая погибающих.
Радуйся, изнемогающих на пути спасения, укрепляющая;
Радуйся, чистоты Хранительнице.
Радуйся, Дево Благодатная, сердца наша злыя умягчающая.

Кондак 11
Пение со трепетом приносят Ти ангелы непрестанно, мы же грешнии, како возможем пети Ти, но дерзаем на Твое благоутробие и со страхом вопием: Аллилуиа.

Икос 11
Светозарное звездо явися нам святая Твоя икона, стрелами своими, яко лучами, весь мир просвещая. Hа ню же взирающе, седмь стрел зрим на ней, яко пресветлыя лучи, умиляющие сердца наша, да с радостию вопием:
Радуйся, стрелами седми, яко лучами нас просвещающая;
Радуйся, ими путь нам показующая.
Радуйся, ими, яко оружием, сердца наша пронзающая;
Радуйся, яко ими диавол от нас прогоняется.
Радуйся, яко ими сердца наша умягчаются;
Радуйся, Дево Благодатная, сердца наша злыя умягчающая.

Кондак 12
Благодать подала еси человеческому роду, дабы отвратить от пути злобы и нечестия, да не погибнут во зле и грехе обретающиеся, но видя таковое Твое к нам милосердие, со страхом вопиют: Аллилуиа.

Икос 12
Воспеваем Тя, ходатаицу пред Сыном Твоим и Богом за ны, грешныя и непотребныя раби Твоя, и вси исповедуем Тя, помощницу сильну и непобедиму, яко да не оставиши нас в день кончины нашея, но да сподобимся пети Сыну Твоему и Богу песнь победную, и Тебе со умилением взываем:
Радуйся, злых наветов Потребление;
Радуйся, нераскаянных грешников Исправление.
Радуйся, изнемогающих от уныния, Скорая Утешительнице;
Радуйся, смирением и терпением снабдевающая.
Радуйся, в час кончины помогающая;
Радуйся, и по кончине, Путеводительнице.
Радуйся, Дево Благодатная, сердца наша злыя умягчающая.

Кондак 13
О, Всепетая Дево Благодатная, род наш спасающая от зла, приими приносимое Тебе малое и недостойное моление, да умягчиши сердца наша злая, да со умилением воззовем сице: Аллилуиа. Аллилуиа. Аллилуиа.
Этот кондак читается трижды, затем икос 1-й и кондак 1-й

Молитва пред иконою Божией Матери Седмистрельная
О, кто не ублажит Тя Дево Благодатная, кто не воспоет Твое милосердие к роду человеческому. Тебе молимся, Тебе просим: не остави нас, во зле погибающих, раствори любовию сердца наша ко врагом нашим, посли стрелу Свою, да уязвит сердца наша миром, и к ближним, и к гонящим нас, аще мир нас ненавидит, простри любовь Свою к ним; аще мир нас гонит, приими нас под кров Свой и подаждь нам силу терпения, да без ропота перенесем испытания, в мире сем бываемыя. О, Госпоже Богородительнице, умягчи сердца злых человек, возстающих на ны, да не погибнут во зле, умоли Сына Твоего и Бога, да умирит жизнь нашу; отец же злобы — диавол, да посрамится. Мы же, воспевая милосердие Твое к нам, злым и непотребным, вопием Ти: О, Пречудная Дево Благодатная, услыши нас в час сей, сокрушенныя сердца имущих, огради миром и любовию друг ко другу и ко врагом нашим, искорени в нас всякую вражду, гнездящуюся в нас, да поживем в благоденствии и мире и в любви к ближним. Да воспоем Сына Твоего Господа нашего Иисуса Христа зде всегда, ныне, и присно, и во веки веков. Аминь.

Тропарь Пресвятой Богородице перед Ея иконой, именуемой «Седмистрельная»
Тропарь, глас 5:
Умягчи наша злая сердца Богородице, и напасти ненавидящих нас угаси, и всякую тесноту души нашея разреши: на Твой бо святый образ взирающе, Твоим состраданием и милосердованием о нас умиляемся и раны Твоя лобызаем, стрел же наших, Тя терзающих, ужасаемся. Не даждь нам, Мати благосердная, в жестокосердии нашем и от жестокосердия ближних погибнути, Ты бо еси воистину злых сердец Умягчение.

Кондак, глас 2:
Благодатию Твоею, Владычице, умягчи сердца злодеев, низпосли благодетелей, соблюдающи их от всякаго зла, благомолящимся Ти усердно пред честными иконами Твоими.

Величание
Величаем Тя, Пресвятая Дево, Богоизбранная Отроковице, и чтим образ Твой святый, имже точиши исцеления всем, с верою и любовию притекающим.