Кондак 1
Взбранной Воеводе и усердной Воспитательнице рода христианскаго, яко избавльшеся от злых, благодарственная восписуем Ти раби Твои, Богородице, но яко имущая державу непобедимую, от всяких бед наших чад свободи, да зовем Ти: Радуйся, благая Воспитательнице, воспитанная во святая святых.

Икос 1
Ангела с Небесе послати чадом нашим исходатайствуй, Пресвятая, у Сына Твоего и Бога нашего, якоже и Тебе послан бысть Гавриил Архангел, и сподоби ны взывати Тебе сице:
Радуйся, рождением своим родителей обрадовавшая;
Pадуйся, со слезами многими у Бога испрошенная.
Радуйся, молитвы и поста светлое прозябение;
Pадуйся, благочестивыя жизни красный плоде.
Радуйся, от младенства Святаго послушания исполненная;
Pадуйся, благочестием от сосца матеря напоенная.
Радуйся, любве всесветлое жилище; радуйся, милостей Господних сокровище.
Радуйся, благая Воспитательнице, воспитанная во святая святых.

Кондак 2
Видящи наше слезное родительское моление, умилосердися, Владычице, о чадех наших, возми их под Свой честный и благосветлый покров, да воззовут в веселии Богу: Аллилуиа.

Икос 2
Разум чадом нашим ниспосли, еже како добре Ти послужити, и наполни сердца их премудростию небесною, подающи едину ю возлюбити, земное же презрети, и не возбрани устом нашим взывати таковая:
Радуйся, детство свое при храме проведшая;
Pадуйся, во святая святых возшедшая.
Радуйся, Единому Богу посвященная;
Pадуйся, молившаяся Ему день и нощь.
Радуйся, чистоту и целомудрие измлада возлюбившая;
Pадуйся, смирение свое всеусердно охранявшая.
Радуйся, молитвою к Богу присно пламеневшая;
Pадуйся, похвало и радосте родителей святых.
Радуйся, благая Воспитательнице, воспитанная во святая святых.

Кондак 3
Сила Вышняго да осенит чада наша Твоего ради неусыпнаго предстательства за них пред Сыном Твоим, и познавше Твое Матернее милосердие ко всем с верою притекающим к Тебе, воззовут Богу: Аллилуиа.

Икос 3
Имуще от Бога чад наших, не хощем зрети их в геенне огненней пребывающих, но записанных в книзе животней. Сего ради, Пречистая Дево, приклонися ко гласу моления нашего, взывающему Тебе:
Радуйся, Мати Бога и Слова;
Pадуйся, святая святых большая.
Радуйся, Воспитательнице Сына Божия;
Pадуйся, Кормилице Господа сил.
Радуйся, яко раждаеши Спасителя мира;
Pадуйся, яко растиши Избавителя плененным.
Радуйся, яко носиши Наставника заблудшим;
Pадуйся, яко Сын Твой — Господь.
Радуйся, благая Воспитательнице, воспитанная во святая святых.

Кондак 4
Бурю Видяще соблазнов многоразличных, умножившихся яко песия мухи и скнипы в пределех наших, к Тебе, Благодатная, взываем о чадех своих, да избегнут сих и вопиют Богу: Аллилуиа.

Икос 4
Слышаще глас Твой, глаголющий Сыну Твоему: «Приими всякаго молящагося Тебе и призывающа имя Мое на помощь», — простираем руце наша на молитве к Твоему милосердию, да возмеши чад наших под покров Свой и исполниши прошения наша таковая:
Радуйся, от уныния злаго чад наших избавляющая;
Pадуйся, от безумнаго веселия их ограждающая.
Радуйся, в несении креста их укрепляющая;
Pадуйся, в подвизех благочестия их утверждающая.
Радуйся, под покровом Твоим милостиво их сохраняющая;
Pадуйся, здравие душ и телес им подающая.
Радуйся, усердная Наставнице целомудрия;
Pадуйся, милостивая Взыскательнице заблудших.
Радуйся, благая Воспитательнице, воспитанная во святая святых.

Кондак 5
Боготечная звезда утренняя, Сын Твой, Пресвятая Дево, да возсияет светом невечерним в сердцах чад наших во еже воззвати им Богу: Аллилуиа.

Икос 5
Видящи наше прилежное моление, не отврати лица Твоего от чад наших, аще и отвратятся Тебе, и услыши глаголы уст наших, вопиющих таковая:
Радуйся, яко научаеши чад наших имети разум на доброе;
Pадуйся, на пути греха их запинающая.
Радуйся, правошествовати их наставляющая;
Pадуйся, от лукавства злых человек их ограждающая.
Радуйся, в злострадании их укрепляющая;
Pадуйся, благодарити Бога за все научающая.
Радуйся, благая Ходатаице присно о чадех наших к Сыну Своему;
Pадуйся, Споручнице их пред Творцом и Богом.
Радуйся, благая Воспитательнице, воспитанная во святая святых.

Кондак 6
Проповедует весь мир христианский Твое всегдашнее заступление о молящихся Тебе. Сице и ныне услыши многоболезненное сие родительское моление о чадех наших, во еже звати им Богу: Аллилуиа.

Икос 6
Да возсияет луча благодати в душах чад наших, и просвещеннии Тобою, узрят путь, ведущий в живот вечный, и последуют по нем, сохраняеми под Твоим всемогущим покровом. Сего ради услыши ны, зовущих Ти таковая:
Радуйся, родителей на любовь благу к чадом своим подвигающая;
Pадуйся, сердца чад, во еже родителей своих чтити, умиляющая.
Радуйся, просящим подающая разум;
Pадуйся, верных озаряющая смыслы.
Радуйся, всех скорбящих радосте;
Pадуйся, умягчение злых сердец.
Радуйся, отрада и утешение;
Pадуйся, прибавление ума.
Радуйся, благая Воспитательнице, воспитанная во святая святых.

Кондак 7
Хотяще чадом нашим вечнаго спасения, со слезами предстоим пред честною Твоею иконою, Владычице, да не презриши моления нашего, зовущаго Сыну Твоему: Аллилуиа.

Икос 7
Новую покажи милость на чадех наших, Владычице, и неизследимыми судбами Сына Твоего привлецы их под Свой благодатный покров, да усердно зовем Ти:
Радуйся, воспитание чад наших, во еже огражденными им быти муки вечныя;
Pадуйся, воспитание чад наших во еже наследовати им блаженство непрестающее.
Радуйся, пробуждение совести чад наших на покаяние;
Pадуйся, питающая их плодами добротолюбия.
Радуйся, премилосердая Утешительнице всех скорбящих и обремененных;
Pадуйся, неусыпающая Наставнице всех заблудших и ослепленных.
Радуйся, Судии праведнаго умоление;
Pадуйся, многих согрешений прощение.
Радуйся, благая Воспитательнице, воспитанная во святая святых.

Кондак 8
Странствующе в юдоли сей многоскорбной по морю многомятежному страстей, чада наша где обрящут твердое пристанище, аще не в Тебе, Пречистая. Cпутешествуй же им и настави их на путь истинный, да зовут Богу: Аллилуиа.

Икос 8
Всем еси Мати милующая, Пречистая Дево, якоже Христос Спаситель рече Тебе, у Креста Его предстоящей: «Се, сын Твой», — указуя на избраннаго от человек. Сего ради вручаем чада наша в руце Твои и во смирении зовем Ти:
Радуйся, чад наших благосердая Путеводительнице;
Pадуйся, терния греховных страстей милосердая Искоренительнице.
Радуйся, отраду в пустыни греха подающая;
Pадуйся, в минуту скорби утешающая.
Радуйся, в землю обетования путеводствующая;
Pадуйся, на воде упокоения веселящая.
Радуйся, совершенный разуме наставников и детоводителей;
Pадуйся, благословение домов и семейств благочестивых.
Радуйся, благая Воспитательнице, воспитанная во святая святых.

Кондак 9
Всякаго блага исполни сердца и души чад наших, отгоняющи от них духа злосмраднаго безбожия, нечестия и блудодейства, господствующа в мире сем. Сохрани рабов Твоих в чистоте и целомудрии, да взывают во умилении Богу: Аллилуиа.

Икос 9
Ветий суемудренных, лжущих на Твое всемощное заступление, отжени, Мати Божия, от чад наших, да не поползнутся умом в душетленные учения и не обратятся сердцем в похоти безместныя, но призри на ны, верно вопиющия:
Радуйся, добрым нравом чад наших научающая;
Pадуйся, от злых навыков их избавляющая.
Радуйся, мудрых наставников Твоим рабом посылающая;
Pадуйся, от худых сообществ их отвращающая.
Радуйся, благому учению внимати призывающая;
Pадуйся, суетныя басни презирати помогающая.
Радуйся, Божие ко грешным благоволение;
Pадуйся, кающихся пред Господем крепкое заступление.
Радуйся, благая Воспитательнице, воспитанная во святая святых.

Кондак 10
Спасти хотя мир, Христос Бог призва не праведники, но грешники на покаяние. Сего ради молися Сыну Твоему о чадех наших, аще и уйдут на страну далече, обаче взысканные Твоим Матерним заступлением, возвратятся в сокрушении сердца к Отцу Небесному и воззовут Ему: Аллилуиа.

Икос 10
Стеною несокрушимою стани, Небесная Царице, чадом нашим, да Твоим предстательством избегнут змиева приношения, краснаго в снедь, последи же смертоноснаго, и возмогуг чистым сердцем пети Тебе таковая:
Радуйся, избавляющая чад наших от ядовитато зелья;
Pадуйся, спасающая их от душепагубнаго пития.
Радуйся, от блудодейства их сохраняющая;
Pадуйся, целомудрию их научающая.
Радуйся, потребление всякаго обольщения;
Pадуйся, избавление всякаго смущения.
Радуйся, трезвения Поборнице;
Pадуйся, мудрости Ходатаице.
Радуйся, благая Воспитательнице, воспитанная во святая святых.

Кондак 11
Пети Твое необоримое заступление выну сподоби чад наших, да обрящут Тебе крепкую Помощницу, и Твоею благодатию отверзут уста свои воспевати Богу: Аллилуиа.

Икос 11
Светоприемною свещею житие чад наших соделай, да присно горят любовию к Тебе и Сыну Твоему, и не презри ны, зовущих Ти:
Радуйся, дым соблазнов разгоняющая;
Pадуйся, мглу страстей просвещающая.
Радуйся, зрение хранити научающая;
Pадуйся, блюсти чувствования вразумляющая.
Радуйся, щедрот неизреченных Мати;
Pадуйся, побуждающая чад наших в благоговении Тебе предстояти.
Радуйся, утешение им в скорби живоносное;
Pадуйся, от набега лукавых прибежище непреложное.
Радуйся, благая Воспитательнице, воспитанная во святая святых.

Кондак 12
Благодатию неизреченною Духа Святаго напитай сердца чад наших, еже возлюбити токмо Сына Твоего и Бога, и Тебе, Преблагую Заступницу, да подвигшеся Тобою, зовут Царю всяческих: Аллилуиа.

Икос 12
Поюще Твое милосердие, имже милуеши и питаеши чад наших, молимся: не престай просити о них Сына Твоего, яко вся Тебе возможна суть, и услыши мольбы наша таковая:
Радуйся, от купели Святаго крещения чад наших Восприемнице;
Pадуйся, к свету истины их Путеводительнице.
Радуйся, росу благодати Твоея им подающая;
Pадуйся, млеком истины их питающая.
Радуйся, яко твориши чад наших земные Ангелы;
Pадуйся, яко претворяеши их в небесные человеки.
Радуйся, наследники Царствия Небеснаго их показующая;
Pадуйся в обителех небесных их водворяющая.
Радуйся, благая Воспитательнице, воспитанная во святая святых.

Кондак 13
О Всепетая Мати Иисуса Сладчайшаго! Приими малое сие моление о чадех наших в воню благоухания духовнаго и возми их под Твой милосердный покров. Еще же даруй им мыслити, глаголати и творити точию Тебе и Сыну Твоему угодная и поели им в жизни сей привременней вся полезная ко спасению душ их, да воспевают Богу: Аллилуиа.
Этот кондак читать трижды, затем икос 1-й «Ангела с Небесе…» и кондак 1-й «Взбранной Воеводе…».

Молитва ко Господу
Господи Иисусе Христе, Сыне Божий, молитв ради Пречистыя Твоей Матере услыши нас, недостойных рабов Твоих, к Тебе прилежно притекающих. Господи, в милостивой власти Твоей чада наша, рабы Твоя (имена). Помилуй и спаси их имене Твоего ради, прости им вся согрешения вольная и невольная, совершенная ими пред Тобою, Господи. Настави их на путь истинный, разум их просвети светом Твоим, сердце согрей любовию Твоею. Господи, благослови их в доме, в учении, в пути и на всяком месте Твоего владычества. Господи, сохрани их под кровом Твоим Святым от летящия стрелы, от огня, меча, от смертоносныя язвы и от напрасныя смерти. Господи, огради их от всех видимых и невидимых врагов, исцели их от всякия болезни, очисти их от всякия скверны и облегчи их душевная страдания. Господи, даруй им благодать Духа Твоего Святаго на многая лета жизни, здравия, целомудрия и благочестия. Господи, умножь и укрепи их душевныя и телесныя силы, Тобою дарованныя им. Даруй Твое благословение чадам нашим на благочестивую и, аще угодно Тебе, семейную жизнь. Господи, даруй нам недостойным и грешным рабом Твоим (имена) благословение на воспитание чад наших и сподоби всех купно достигнути Вечнаго Царствия и тамо прославити пречестное и великолепое Имя Твое Отца и Сына и Святаго Духа. Аминь.

Молитва к Божией Матери
О Пресвятая Владычице Дево Богородице, премилосердая Мати всех человек, спаси и сохрани под кровом Твоим чад наших (имена), всех отроков, отроковиц, младенцев и во чреве матери носимых. Укрой их ризою Твоею, соблюди их во страсе Божием и послушании родителем, умоли Господа нашего и Сына Твоего, да дарует им вся полезная к душевному спасению. Вручаем их Твоему Материнскому смотрению, яко Ты еси Божественный покров рабом Твоим.

Тропарь, глас 4:
Воспитавшейся во храме во святая святых, одеянней верою и премудростию и безмерным девством, архистратиг Гавриил принесе с небесе целование и еже «Радуйся, радуйся Благословенная, радуйся, Препрославленная, Господь с Тобою».