Кондак 1
Избрании Богом во свидетельство Православныя веры, мужески попрасте святии мученицы языческое нечестие, и за ваша страдания нетленными венцы от Христа Бога увенчастеся; темже мы, ублажающе вашу память, всеумиленно взываем к вам:
Радуйтеся святии мученицы, Антоние, Иоанне и Евстафие.

Икос 1
Ангели земнии и человецы небеснии явистеся, святии мученицы, егда озарившеся светом истиннаго Богопознания, радостно потекосте на страдальческий подвиг. Приимите убо от нас хвалебное пение сие:
Радуйтеся, Богоблажении исповедницы православныя веры, издревле насажденныя в земли Российско-Литовстей.
Радуйтеся, неумолкающии глашатаи истинного благочестия.
Радуйтеся, велии подвижницы, ни во чтоже вменившии славу мира сего, да Христа Бога приобрящете.
Радуйтеся, возлюбившии Христа Бога всем вашим сердцем и всею душею.
Радуйтеся, кровию вашею запечатлевшии любовь вашу к Господу Иисусу.
Радуйтеся святии мученицы, Антоние, Иоанне и Евстафие.

Кондак 2
Видяще, яко нетленныя мощи ваша даруют всем притекающим с верою, исцеление от болезней душевных и телесных, благодарим милосердаго Бога, прославившаго вас, святии мученицы таковою благодатию, и вопием Христу Спасителю: Аллилуиа.

Икос 2
Разумныя очеса ваша вперивше в познание истинныя веры, вы, святии братия, Антоние и Иоанне, мужемудренно отвергостеся языческаго прельщения, и за исповедание единаго истиннаго Бога радостно приясте узы, темничное заключение, раны и лютую смерть. Таковому подвигу вашему поревновав и юный Евстафий, небоязненно исповеда себе христианина быти, и сподобися таковых же лютых за Христа мучений и смерти. За таковое ваше, еже за Христа святое дерзновение, взываем к вам сице:
Радуйтеся, блаженная троице честных страстотерпцев, прославивших истиннаго Бога во Святей Троице покланяемого, Отца, Сына и Святого Духа.
Радуйтеся, доблии воины Христовы, сохранившии верность ко Владыце до смерти.
Радуйтеся, не убоявшиися претерпети за Христа никиих мук.
Радуйтеся, яко ни теснота, ни узы, ни страдания, ни самая смерть не возмогоша разлучити вас от любве Христовой.
Радуйтеся, изгнаннии, поруганнии и убиеннии правды ради, яко мзда ваша многа на небеси.
Радуйтеся, святии мученицы, Антоние, Иоанне и Евстафие.

Кондак 3
Силою Вышняго укрепляеми, небрегосте святии мученицы, тяжкаго страдания ваших телес, преданных мукам, и на мучения, аки на брачный пир, радостно текосте; мы же благодарственно взываем укрепившему вас Христу Богу: Аллилуиа.

Икос 3
Имуще крепкую надежду на небеснаго Царя и Бога, и помняще апостольское слово, яко подобает повиноватися Богу паче неже человеком, вы, святии мученицы, не повинустеся велению вашего мучителя, еже возвратитися к прежнему языческому нечестию.
Радуйтеся, убо исповедавшии Христа пред человеки, и от Него исповеданнии пред Отцем Небесным.
Радуйтеся, вернии слузи Христовы, за верность свою наследовавшии Царствие Небеснее.
Радуйтеся, сожителие ангелом и приснии всем святым.
Радуйтеся, водвореннии в невечернем дни Царствия Божия.
Радуйтеся, призирающии с небеси на земную братию вашу и молящиися о всех, призывающих вас на помощь.
Радуйтеся, святии мученицы, Антоние, Иоанне и Евстафие.

Кондак 4
Буря ярости ваших мучителей не поколебала крепкой вашей веры, надежды и любве к Спасителю Богу, и вы святии мученицы, ревностно упреждаете друг друга в тяжких страданиях, воспевая Богу в сердцах ваших: Аллилуиа.

Икос 4
Слышана бысть по всей православней земли радостная весть, яко вы, святии мученицы, подвигом добрым подвизастеся, течение ваше добре скончасте и веру до конца соблюдосте. Сего ради мы со всею Православною Церковию ублажаем вас:
Радуйтеся, исполнившии слово Христово, еже претерпевый до конца, той спасен будет.
Радуйтеся, вашим терпением удивившии мучителей ваших.
Радуйтеся, примером вашей жизни и смерти обратившии многих ко Господу.
Радуйтеся, яко и ныне чудесами, истекающими от святых ваших мощей, вы укрепляете православную веру в людех.
Радуйтеся, яко за терпение ваше соблюдеся вам венец правды на небеси.
Радуйтеся, святии мученицы, Антоние, Иоанне и Евстафие.

Кондак 5
Боготечными звездами православныя веры бысте, вы святии мученицы, для ваших земных соотчичей, указуя для них в Православней Церкви единый надежный путь ко спасению, да вси единым сердцем и едиными усты взывают спасающему Богу: Аллилуиа.

Икос 5
Видено бысть чудное знамение Божией благости, егда честное место ваших страданий озарил свыше облачный столп, указующий вам путь к небеси, якоже древле израильтяном из Египта в землю обетованную. Сего ради воспеваем к вам:
Радуйтеся, чада новаго Израиля, достигшии горняго небеснаго Иерусалима.
Радуйтеся, добре прошедшии многотрудное странствие ваше в пустыни сея жизни, и вселившиися в стране обетованней вечней.
Радуйтеся, яко не Моисей, но Сам Христос Бог бысть для вас вождем к небесному отечествию.
Радуйтеся, победившии всех ваших супостатов и противников на пути к Царствию Небесному.
Радуйтеся, блаженнии небожители, вкушающии вечная блага, их же око не виде, и ухо не слыша, и яже на ум человеку не взыдоша.
Радуйтеся, святии мученицы, Антоние, Иоанне и Евстафие.

Кондак 6
Проповедуют святыя мощи ваша, паче всякаго красноречия, несумненную надежду всеобщаго воскресения, егда Бог, не дающий и ныне преподобным Своим видети истление, воззовет к пакибытию весь род человеческий, и вси сподобльшиися стати одесную престола Господня, воспоют Ему: Аллилуиа.

Икос 6
Возсия новый свет для всея Российкия земли, егда милосердый Бог явил величие Своих чудес над вашими нетленными мощами, яже страха ради иноверческаго вторицею сокрыты быша в недрех земли под спудом храма, и оттоле источаху обильныя исцеления всем, с теплою молитвою прибегавшим к вашей честной иконе. Приимите же от нас, святии мученицы, сие усердное славословие:
Радуйтеся, светозарныя светила Христовой Церкве, не могущия сокрытися под спудом.
Радуйтеся, скории врачи душ и телес наших.
Радуйтеся, защитники наши от зловредных иноверческих мудрований.
Радуйтеся, светлии вожди наши к истинному богопознанию и богопочтению.
Радуйтеся, усерднии молитвенницы наши пред Господем.
Радуйтеся, святии мученицы, Антоние, Иоанне и Евстафие.

Кондак 7
Хотяще прославити Господа Бога дивнаго во святых Своих, не обретаем довольных слов еже благохвалити Его по достоянию; но вас, святии мученицы, призываем на помощь, молитеся за ны прилежно, да неосужденно дерзаем воспевати Господу: Аллилуиа.

Икос 7
Новоявленными мучениками нарекла вас Православная Церковь, яко матерь, веселящаяся о чадех своих; и якоже древнии мученицы по всей вселенней своими страданиями утвердиша божественную веру: подобне им и вы, новоявленнии мученицы, тако утвердисте святую веру в месте земнаго отечествия вашего, яко никия козни иноверия не могут поколебати ея, и мы, благодаряще, взываем к вам:
Радуйтеся, твердии столпы Православия, ими же красуется и укрепляется святая Церковь.
Радуйтеся, искуснии кормчии, благонадежно ведущии нас, среди временных волнений к пристанищу вечныя жизни.
Радуйтеся, споспешницы нашего оправдания.
Радуйтеся, яко молитвами вашими мы избавляемся от всякаго лукаваго прельщения, ищущаго уловити души наша.
Радуйтеся, благодетелие наши, указующии нам путь ко спасению.
Радуйтеся, святии мученицы, Антоние, Иоанне и Евстафие.

Кондак 8
Странное и для ума человеческаго непостижное, обаче явнозримое нами чудо всемогущества Божия является в нетлении святых ваших мощей, яже больше полутысящи лет пребывают невредимы от разрушительных стихий, и от времени всепоядающаго, воздвизая нас со умилением пети Господу: Аллилуиа.

Икос 8
Вся радости века сего, всю честь вашего звания и всю крепость ваших сил принесосте, святии мученицы, в жертву Спасителю Богу, и сподобистеся от Него мздовоздояния на небеси, идеже ни червь, ни тля тлит, ни татие не подкопывают, и не могут похитити дарованного вам наследия.
Радуйтеся, убо мудрии искатели царствия Божия, подобнии евангельскому мужу, иже обрет на селе сокровище сокровенно, вся продает, елика имать, и купует то село драгоценное.
Радуйтеся, обретшии един многоценен бисер, иже есть Царствие Божие, и за него отдавшии вся блага мира сего.
Радуйтеся, паче мудрых века сего, уразумевшии цену бытия земнаго.
Радуйтеся, святии проповедницы, возвещающии нам из вашего гроба, яка недостойны суть страсти нынешняго времене к хотящей явитися славе грядущаго царствия.
Радуйтеся, граждане небеснии и сонаследницы всем святым.
Радуйтеся, святии мученицы, Антоние, Иоанне и Евстафие.

Кондак 9
Всякия скорби, болезни и прилоги наша вы утоляете, святии мученицы, и темныя зраки лукавых бесов далече от нас отгоняете, да тако вашею помощию, благодатию же Божиею спасаеми, благодарным и радостным гласом воспеваем Богу: Аллилуиа.

Икос 9
Витийство человеческое немотствует, тщашеся восхвалити вас, святии мученицы, за ваша страдания, яже претерпесте Христа ради, и за вашу мученическую смерть. Обаче любовию вашею побеждаеми, елико можем, ублажаем вас:
Радуйтеся, возвеселившии весь ангельский лик вашим за Христа терпением и страданием.
Радуйтеся, дружелюбно принятыи на небеси от всего сомна праведников и угодников Божиих.
Радуйтеся, яко представше престолу Господню, сподобилися есте поклонитися Ему и получити от Него вечную награду.
Радуйтеся, обитающии во светлостех святых, идеже несть болезнь, ни печаль, ни воздыхание.
Радуйтеся, утешители всех гонимых и терпящих за Христову веру.
Радуйтеся, святии мученицы, Антоние, Иоанне и Евстафие.

Кондак 10
Спасения и вечнаго покоя достигше после многоскорбныя земныя жизни, вы и нас, святии мученицы, поучаете, яко един есть истинный путь ко спасению в сем мире злом и лукавом, еже вся благодушно терпети Христа ради, воспевающе Ему усердно: Аллилуиа.

Икос 10
Стены пещернаго храма, едеже нетленно почивают ваши цельбоносная телеса, просвещаются, аки небесный чертог, и вси жаждущии спасения прибегают к вам, святии мученицы, с мольбами, с благодарением и с славословием:
Радуйтеся, помощницы наши в скорбех, болезнех и печалех.
Радуйтеся, ходатаи наши пред престолом Небеснаго Судии живых и мертвых.
Радуйтеся, яко никто же прибегаяй к вам помощи ради, отходит от вас тощ.
Радуйтеся, щедрии подателие нам Божией милости.
Радуйтеся, обрадовании на небеси, и нас на земли укрепляющии в радостной надежде вечнаго спасения.
Радуйтеся, святии мученицы, Антоние, Иоанне и Евстафие.

Кондак 11
Пению ангельскаго лика на небеси совокупльше ваши преподобныя гласы, вы, святии мученицы, купно с небесными чинми, непрестанно славите Господа Бога. И мы недостойнии, уповающе на милосердие Божие, дерзаем на земли бренными устами и благодарным сердцем воспевати Ему: Аллилуиа.

Икос 11
Светозарнаго дне всеобщаго воскресения, и страшнаго суда Божия чающе, ужасаемся лютых наших деяний и безмерных грехов, ими же ежечасно прогневляем Создателя и Спасителя нашего; но имея вас, святии мученицы, предстательствующих за ны пред Господем, благодарственно взываем к вам:
Радуйтеся, яко мы по Бозе и по Пречистой Приснодеве Богородице все наше упование на вас возлагаем.
Радуйтеся, яко вы не посрамите нас от чаяния нашего.
Радуйтеся, яко молитвами вашими мы уповаем получити отпущение грехов и жизнь вечную.
Радуйтеся, благословеннии Отца небеснаго, наследовавшии уготованное вам царствие от сложения мира.
Радуйтеся, яко и мы вашим заступлением, чаем избежати участи стоящих ошуюю престола Судии.
Радуйтеся, святии мученицы, Антоние, Иоанне и Евстафие.

Кондак 12
Благодать чудесных исцелений, и скораго предстательства за нас пред Господом имуще, не преставайте, святии мученицы, выну помогати нам, славящим о вас Христа Бога, и вопиющим Ему: Аллилуиа.

Икос 12
Поюще ваше светлое прославление на небеси и на земли, благодарим всемилостиваго Спаса и Бога нашего, яко содержай в Своей руце времена и лета, благоволил прославити и явити нам вас, святии мученицы, в благопотребное для нашего спасения время, да не погрязнем в тимении пагубных страстей и неразумных стремлений; сего ради возсылаем к вам наше усердное благохваление:
Радуйтеся, неусыпнии стражи нашего спасения, берегущии нас от всякаго навета неприязненнаго.
Радуйтеся, хранителие наши, удаляющии от нас всякое вредное искушение.
Радуйтеся, искуснии наставницы наши в непоколебимом и твердом исповедании православныя веры.
Радуйтеся, громогласнии органы благодати Божией, наполняющей Православную Церковь.
Радуйтеся, великии соотчичи наши, всем нам желающии и помогающии спастися.
Радуйтеся, святии мученицы, Антоние, Иоанне и Евстафие.

Кондак 13
О преславнии и святии мученицы: Антоние, Иоанне и Евстафие! Приимите сие малое, но усердное моление наше, и ходатайством вашим у Христа Бога, избавьте нас от всех болезней душевных и телесных, и от всякаго прилога вражия, и от всякия беды и напасти, да выну, благодаряще о вас Господа Бога, радостно воспеваем Ему: Аллилуиа.
Сей кондак глаголи трижды, затем икос 1-й, затем кондак 1-й

Молитва святым мученикам Антонию, Иоанну и Евстафию
Святии мученицы, Антоние, Иоанне и Евстафие! Призрите с небеснаго чертога на требующих вашей помощи, и не отвергните прошений наших; но яко приснии благодетели и ходатаи наши, молите Христа Бога, да человеколюбив и многомилостив сый, сохранит нас от всякаго лютаго обстояния: от труса, потопа, огня, меча, нашествия иноплеменников и междоусобныя брани. Да не осудит нас грешных по беззакониям нашим, и да не во зло обратим благая, даруемая нам от всещедраго Бога, но во славу святаго имени Его, и в прославление крепкаго вашего заступления. Да молитвами вашими даст нам Господь мир помыслов, воздержание от пагубных страстей и от всякия скверны; и да укрепит во всем мире Свою едину Святую, Соборную и Апостольскую Церковь, юже стяжал есть честною Своею Кровию. Да утвердит во Святей Своей Православней Церкви живый дух правыя веры и благочестия: да мы вси в мире и благочестии поживем в настоящем веце, и достигнем блаженныя вечныя жизни на небеси, благодатию Господа нашего Иисуса Христа, Емуже подобает всякая слава, честь и держава со Отцем и Святым Духом, ныне и присно, и во веки веков. Аминь.

Тропарь святым мученикам Антонию, Иоанну и Евстафию
Тропарь, глас 4:
Иже земных чести и славы отвергшеся, доблии и честнии страдальцы, веры ради крепко, и мужественно муки претерпесте, на смерть себе вдавше за Живот всех, Владыку. Темже и Христос преславно столпом облачным с небесе вас озари и почестьми и венцы от Престола Славы венча, со Ангелы Тому предстояще, молите спастися душам нашим.

Ин тропарь, глас 4:
От корене неплодна, преблаженнии, возрастивше православныя веры ветви, первомучеником тезоименитии явистеся: злаго бо и нечестиваго князя ярости не убоястеся, повелевающа Христа отрещися, сего ради мученическия венцы приемше и со Ангелы престолу Владычню предстояще, о нас молитеся, преблаженнии, православно чтущих святую память вашу.

Кондак, гл. 3:
Отеческую прелесть оставльше святии, приведостеся Христови, всем души усердием стасте, мужемудренно до смерти, темже и взясте победы почесть воистинну, о всех Владыку нашего непрестанно моляще.

Величание
Величаем вас, святии мученицы Антоние, Иоанне и Евстафие, и чтем честная страдания ваша, яже за Христа претерпели есте.