Кондак 1
Избранней от славнаго святаго рода иерейскаго и к лику святых сопричтенней, служительнице Божией и преславней исповеднице Христовой, преподобномученице Арсении, яко покровительнице нашей и заступнице, похвальное духовное приносим пение. Ты же, имущи дерзновение ко Господу, от всяких нас бед и болезней свободи, да со умилением и любовию зовем ти:
Радуйся, преподобномученице Арсение, всехвальная исповеднице веры Православныя.

Икос 1
Ангельскою ко Господу горящи любовию и образу благочестивых родителей твоих подражающи, вся прелести суетнаго мира оставила еси и на узкий и тернистый путь, ведущий в Небесное Отечество, вступила еси. Мы же, воспоминающе праведный род твой, три века усердно Богови послуживший, и множество иереев, архиреев и святителя Иова, перваго Патриарха Московскаго и всея Руси, израстивший, и воспоминающе добродетельное житие твое, мати Арсение, восхваляем тя сице:
Радуйся, яко издетска Христа возлюбила еси;
Pадуйся, яко измлада всю себе Богу предала еси.
Радуйся, добронравных родителей благочестивая дщи;
Pадуйся, велие их утешение.
Радуйся, любве к Церкви Христовой от них унаследившая;
Pадуйся, благословение на служение Господу от них получившая.
Радуйся, от корене рода святаго доброплодная ветве;
Pадуйся, святителю Иову, в смутное время за веру Христову пострадавшему, уподобившаяся.
Радуйся, преподобномученице Арсение, всехвальная исповеднице веры Православныя.

Кондак 2
Видя Господь чистоту сердца твоего и теплую любовь ко иноческому житию, благоволи призвати тя на служение Царице Небесней, во святую обитель Воскресенско-Феодоровскую, идеже в посте и молитве неленостно подвизалася еси и жития равноангельнаго достигла еси. Сему Божию о тебе промышлению дивящеся, вопием: Аллилуиа.

Икос 2
Разум богомудрый стяжала еси и велию ревность по Бозе; добродетельми, аки лествицею, от силы в силу восходила еси, проповедница благочестия воистину явилася еси. Мы же, зряще прехвальныя труды и подвиги твоя, с благоговением и радостию глаголем ти сицевая:
Радуйся, во обитель святую, яже на Тезе реце, пришедшая;
Pадуйся, Пресвятей Владычице во обители Ея верно послужившая.
Радуйся, во игумению Господем тамо возведенная;
Pадуйся, труды и подвиги тамо прославленная.
Радуйся, суету земную ни во чтоже вменившая;
Pадуйся, небесная сокровища зело возлюбившая.
Радуйся, благодать Духа Святаго стяжавшая;
Pадуйся, все упование твое на Бога возлагавшая.
Радуйся, преподобномученице Арсение, всехвальная исповеднице веры Православныя.

Кондак 3
Силою Христовою укрепляема, преподобная мати, немощи телесныя небрегла еси, подвигом добрым подвизатися хотящи. Евангельстей истине поревновавши, сораспятися Господу всем сердцем возжелала еси, по пути спасения за Ним последовала еси, веру в Троицу Божественную проповедовала еси, Богу вопиющи: Аллилуиа.

Икос 3
Имущи велию любовь ко Господу, всеблаженная мати, плоть свою распяла еси со страстьми и похотьми, постом и воздержанием страсти умерщвляла еси, послушанием и самоукорением наветы вражия сокрушала еси. Сего ради восхваляем тя:
Радуйся, образ подвига иноческаго чрез все житие твое пронесшая;
Pадуйся, в ризу смирения христианскаго себе облекшая.
Радуйся, хуже всех себе почитавшая;
Pадуйся, осуждати и укоряти других всегда избегавшая.
Радуйся, чистотою сердца всех и вся удивлявшая;
Pадуйся, сего ради велия духовныя высоты скоро достигшая.
Радуйся, от чудесных наставниц Софии и Афанасии жезл игуменский достойно приявшая;
Pадуйся, от них же странноприимство и попечение о сиротах унаследившая.
Радуйся, преподобномученице Арсение, всехвальная исповеднице веры Православныя.

Кондак 4
Бурю злых напастей, нестроений и искушений кротостию, молитвою и незлобием утишала еси, богомудрая мати, добродетельми христианскими, аки щитом, от стрел лукаваго защищалася еси и советом святых отец внимала еси, темже прошла еси весь путь многотруднаго иноческаго жития, подвигом мученичества той завершивши, и во обители небесныя вселилася есй, идеже вкупе со святыми поеши Богу: Аллилуиа.

Икос 4
Слышаще и видяще богоугодное житие твое, преподобномученице святая, вси ближнии и дальнии удивляхуся смирению твоему и, приходяще во обитель сию, поучахуся словесем и подвигом твоим; с нимиже и мы, восхваляюще тя, умиленно зовем:
Радуйся, яко святое игуменское послушание со смирением прияла еси;
Pадуйся, яко непрестанную молитву Иисусову стяжала еси.
Радуйся, яко в скорбех терпение неистощимое явила еси;
Pадуйся, благоговейная служительнице Христова.
Радуйся, яко образом жития своего на путь спасения наставляла еси;
Pадуйся, яко притекающих во обитель твою к покаянию призывала еси.
Радуйся, явление чудное смиренномудрия и кротости;
Pадуйся, образе истинныя веры и чистоты.
Радуйся, преподобномученице Арсение, всехвальная исповеднице веры Православныя.

Кондак 5
Боготечней звезде уподобилася еси, верная служительнице Христова, просвещающи светом апостольских истин люди земли Ивановския и наставляющи их на путь спасения; темже молим тя: не остави и нас, в суете мира сего погибающих, просвети омраченная грехом сердца наша и к жизни небесней направи, научающи Спасителю мира воспевати песнь: Аллилуиа.

Икос 5
Видяще людие, яко сбывается предречение Кронштадтскаго светильника, праведнаго Иоанна, благословившаго создание святыя обители сея, яже процветет, по слову его, яко крин, и зряще дары духовныя твоя, во множестве притекаху во обитель сию; ты же, мати Арсение, всех с радостию принимала еси, согревающи любовию Христовою. Ныне убо и мы к тебе с надеждою прибегаем и твоего молитвеннаго заступления просим, воспевающе тако:
Радуйся, мысль свою в Бозе утвердившая;
Pадуйся, на высоту безстрастия возшедшая.
Радуйся, милосердием твоим всех утешавшая;
Pадуйся, никогоже, приходящаго к тебе, не отринувшая.
Радуйся, благочестия и добролюбия усердная насадительнице;
Pадуйся, сирых и убогих благая попечительнице.
Радуйся, ты бо скорбь человеческую, яко свою, восприяла еси;
Pадуйся, яко обитель сию от бед и напастей молитвою защищала еси.
Радуйся, преподобномученице Арсение, всехвальная исповеднице веры Православныя.

Кондак 6
Проповедник воли божественныя бысть преподобный отец наш Серафим, преславный Саровский чудотворец, егда явися во святей обители в видениих отроковице и некоему благочестивому человеку и благослови обитель сию. Ты же, всехвальная мати, в дивных видениих сих уразумевши молитвенное заступничество преподобнаго пред Господем, исполненная духовныя радости, за вся славила еси Бога, воспевающи Ему: Аллилуиа.

Икос 6
Возсия благословением Господним под всемощным Покровом Царицы Небесныя и молитвенным предстательством отца нашего преподобнаго Серафима святая обитель Воскресенско-Феодоровская, обустроенная труды и слезами монахинь богомудрых, притекших под кров ея, во еже спастися и угодити Богу. Ты же, игумение всеблагая, чад твоих молитвами неусыпными от всякаго зла охраняла еси, на невидимую брань духовную укрепляла еси; сего ради воспеваем тя сице:
Радуйся, благодатию Духа Святаго осиянная;
Pадуйся, терпеливодушная наставнице наша и заступнице.
Радуйся, скорбящих скорая утешительнице;
Pадуйся, милостей Божиих присная ходатаице.
Радуйся, людем, в суете пребывающим, правду Божию открывавшая;
Pадуйся, любити ближних своих с самоотвержением научавшая.
Радуйся, терпения, незлобия и безгневия учительнице;
Pадуйся, истинныя веры поборнице и христианских добродетелей наследнице.
Радуйся, преподобномученице Арсение, всехвальная исповеднице веры Православныя.

Кондак 7
Восхотела еси внити в Царствие Небесное, еже Господь обеща любящим Его, и, Божественным светом озаренная, путь спасения во исполнении евангельских заповедей духовныма очима узрела еси, и, смиренно приемши Крест, Христу последовала еси, ныне же купно со Ангелы поеши песнь Творцу: Аллилуиа.

Икос 7
Новую мученицу прослави тя Господь в сонме новомучеников и исповедников Российских, егда велия скорбь прииде во отечество твое. Болезньми и гладом в узилищах изнуряема, Христу даже до смерти верна пребыла еси и тем исполнила еси вся, елико заповеда нам Господь во святем учении Своем; мы же покланяемся честным страданием твоим и воспеваем ти таковая:
Радуйся, святая мученице, за веру Христову тяжкая страдания претерпевшая;
Pадуйся, безсильныя злобы богоборцев не устрашившаяся.
Радуйся, скорби, Господем низпосланныя, с народом своим разделившая;
Pадуйся, гонения, яко наказание Божие, за отступление от веры Христовы попущенное, со смирением приявшая.
Радуйся, Господа Вышняго верная служительнице;
Pадуйся, славы Божия дерзновенная проповеднице.
Радуйся, евангельских истин усердная насадительнице;
Pадуйся, правды Божия утверждение и Царства Христова наследнице.
Радуйся, преподобномученице Арсение, всехвальная исповеднице веры Православныя.

Кондак 8
Странное зело и страшное узрела еси, чадолюбивая мати, егда ополчи враг рода человеческаго злобу людей безбожных на веру Православную: разорение обители сея, гонение, заточение, поношение, мучение и погубление безвинных чад твоих. Мы же, со слезами и благоговением воспоминающе сицевыя доблестныя подвиги вашего исповедничества, славим Дивнаго во святых Своих Господа и вопием Ему: Аллилуиа.

Икос 8
Всем сердцем Богу предалася еси и всею душею Того возлюбила еси, преподобная мати, ничтоже предпочитавши паче любве Христовы, проходящи путь земный, по учению апостола, в Дусе Святе, в силе Божией, с оружием правды в деснице и шуйце. Того ради услыши от нас, тщащихся подражати ти, похвалы сия, с любовию возносимыя:
Радуйся, яко истинную ко Господу любовь показала еси;
Pадуйся, яко в долгих испытаниих непоколебима пребывала еси.
Радуйся, тесноту и поругания за Христа, яко Божие изволение, претерпевшая;
Pадуйся, по слову апостола, силу Божию, в немощех наших совершающуюся, приявшая.
Радуйся, веру Христову до смерти сохранившая;
Pадуйся, венца безсмертныя жизни от руки Вседержителя сподобившаяся.
Радуйся, во врата райская возшедшая;
Pадуйся, чада духовная и по смерти твоей не оставляющая.
Радуйся, преподобномученице Арсение, всехвальная исповеднице веры Православныя.

Кондак 9
Всякия болезни, скорби и мученическую кончину в темнице Ивановстей кротко претерпела еси, мати Арсение, яко жертву принесши житие твое Христу Богу, Спасителю нашему, и ныне, с Невещественными в вышних предстоящи Престолу Троицы Пресвятыя, молишися о нас, вопиющи Богу: Аллилуиа.

Икос 9
Витии многовещаннии не могут достойно воспети твоих благодеяний множество. Не убоялася еси, мати милосердная, во дни безбожия лютаго, странноприимное деяние совершити и гонимаго святителя Серафима, летописца Дивеевскаго, во обители святей приютила еси, исполненная любве Христовы, еже душу положити за други своя. Сему дивному мужеству твоему поем славу и величаем тя сице:
Радуйся, щедрот и милостей струе неизсякаемая;
Pадуйся, любве и сострадания явление многочудное.
Радуйся, благочестия и братолюбия хранительнице;
Pадуйся, в беде спасительныя руки подательнице.
Радуйся, милостивых блаженство от Господа стяжавшая;
Pадуйся, надежду на Бога полагати научавшая.
Радуйся, ближния паче себе возлюбившая;
Pадуйся, людем, не имевшим где главу подклонити, страннолюбивая мати явившаяся.
Радуйся, преподобномученице Арсение, всехвальная исповеднице веры Православныя.

Кондак 10
Спасения души своей от юности искала еси, егоже желала еси и всем человеком, сего ради в великий ангельский образ облещися удостоенная, наречена бысть Фомою, егда, тяжкому изгнанию подвергшися от власти нечестивыя, сослана бысть в землю Алма-Атинскую, в весь Каркалинскую; и тамо, силою схимы укрепленная, за весь мир молилася еси и Господа славила еси, воспевающи Ему песнь: Аллилуиа.

Икос 10
Стену необоримую и ограждение нерушимое обители Воскресенско-Феодоровстей дарова тя Господь, мати Арсение, темже и мы паки и паки к заступлению твоему с верою и любовию прибегаем, да спасаемии тобою, сице глаголем:
Радуйся, жезлом игуменским вся видимыя и невидимыя враги устрашающая;
Pадуйся, Крестом Христовым тех поборающая.
Радуйся, святыя обители твоея невидимое охранение;
Pадуйся, от бесов и злых людей защищение.
Радуйся, великаго ангельскаго образа достойная носительнице;
Pадуйся, схимнице благая, полков демонских сокрушительнице.
Радуйся, призывающим тя неложное упование;
Pадуйся, православныя веры небесное укрепление.
Радуйся, преподобномученице Арсение, всехвальная исповеднице веры Православныя.

Кондак 11
Пение умиленное приносим Христу Богу, прославившему тя, всехвальная мати, яко дарова нам таковую скорую во всех скорбех заступницу. Темже славим тя, просяще твоего молитвеннаго предстательства ко Господу, Емуже воспеваем: Аллилуиа.

Икос 11
Светозарная свеща явися житие твое, преславная мати Арсение, во мраце безверия благодатию Божиею освещающе путь православным людем и направляюще их к свету Христову. Просвети и ныне тьму неведения, уныния и стеснения сердечнаго, находящаго на нас от маловерия и малодушия, да молитвами твоими ограждаемии, поем ти:
Радуйся, учение Спасителя о блаженствах Евангельских житием своим исполнившая;
Pадуйся, нищету духовную стяжавшая и смиренномудрие обретшая.
Радуйся, плачущая и скорбящая денно и нощно о гресех своих;
Pадуйся, кротостию Царствия Небеснаго достигшая.
Радуйся, алчущая и жаждущая правды Божия;
Pадуйся, милостивая подательнице всем нуждающимся и за чистоту сердца Господа узревшая.
Радуйся, миротворице, всегда готовая умирити враждующих;
Pадуйся, изгнанная правды Божия ради и ныне на Небесех веселящаяся.
Радуйся, преподобномученице Арсение, всехвальная исповеднице веры Православныя.

Кондак 12
Благодать Пресвятаго Духа стяжала еси в житии твоем за велию любовь к Отцу Небесному и к ближним своим; веруем, яко и по смерти благодать сия пребывает с тобою, сего ради молим тя: испроси у Господа Сил, да сохранит Церковь Православную от неверия и расколов, да избавит нас от всяких бед и напастей, вопиющих Ему: Аллилуиа.

Икос 12
Поем дивное твое житие, угоднице Божия Арсение, ублажаем великия и преславныя твоя подвиги, почитаем мученическую кончину твою, величаем небесную славу твою, днесь бо предстоиши Престолу Вседержителя, и во умилении сердец наших похвальная зовем ти сице:
Радуйся, Пресвятыя Владычицы достойная избраннице;
Pадуйся, почитающих светлую память твою небесная покровительнице.
Радуйся, со Ангелы бо присно ликуеши;
Pадуйся, со святыми всеми ублажаемая.
Радуйся, со святым преподобным Серафимом у Престола Божия неусыпная о нас, грешных, ходатаице;
Pадуйся, со святым праведным Иоанном Кронштадтским присная о нас печальнице.
Радуйся, Церкве Российския преславное похваление;
Pадуйся, земли Ивановския предивное украшение.
Радуйся, преподобномученице Арсение, всехвальная исповеднице веры Православныя.

Кондак 13
О, многострадальная и славная заступнице наша, преподобномученице Арсение! Дивную икону твою с благоговением лобызаем и взываем к тебе: малое сие моление приими от нас, недостойных чад твоих, от любве тебе нами приносимое; молися ко Господу Богу, да подаст нам грехов прощение и сподобит с тобою вкупе во обителех небесных воспевати Ему: Аллилуиа.
Этот кондак читается трижды, затем икос 1-й и кондак 1-й

Молитва
О, всехвальная угоднице Христова, преподобномученице Арсение, всею душею Господа возлюбившая и подвиг мученичества Того ради совершившая! О верная рабо Царя Небеснаго, добродетелей насадительнице, образе смирения, собеседнице Ангелом, славо и украшение обители сей святыя, стено необоримая и велие заступление ея! К тебе с верою и надеждою притекаем и умиленно просим: моли непрестанно Владыку и Господа Иисуса Христа, Бога нашего, яко имущая к Нему дерзновение велие, да не отступит от нас Его вседействующая благодать. Молим тя, пресвятая мати, недостойная чада твоя, Промыслом Божиим в обитель сию приведенная и под кровом ея ныне тебе молящаяся: испроси молитвами твоими у Христа Бога нашего, да просветит наш ум, очистит совесть нашу от всякия скверны, от нечистых и лукавых помыслов и губительнаго уныния и избавит нас от всяких демонских наветов и озлоблений, дарует же нам искреннее покаяние, сокрушение, воздержание и трезвение сердечное, чистоту душевную и телесную, да восприимем страннолюбию и нищелюбие, ихже ты бысть усердная насадительница, нелицемерную любовь друг ко другу и всякое благочестие. В скорбная времена, настоящая и грядущая, да подаст нам Господь силу донести до конца свой крест, да сохранит от мирских искушений, от диавольских сетей и печати богомерзкаго антихриста. На тя бо, мати, все упование наше возлагаем: да возродит Господь обитель сию в былом благолепии, да процветет она паки, яко крин, да возсияет в земли Ивановстей, спасающи всех с верою к тебе притекающих и помощи у тебе просящих. Умоли, угоднице Божия, Всевышняго Творца даровати мир и благочестие стране нашей православней, сохрани святую обитель твою и всех живущих, подвизающихся и спасающихся в ней от всякаго зла и приведи нас предстательством твоим в светлое Царство Христово, идеже вси праведнии вкупе с тобою присно славят Отца и Сына и Святаго Духа, ныне и присно и во веки веков. Аминь.

Тропарь преподобномученице Арсении, игумении Сергиевской
Тропарь, глас 7:
Благодатию Божиею укрепляемая, страдания и гонения кротко претерпела еси, сего ради венцем нетленным от Христа Бога увенчалася еси, блаженная мати Арсение, и ныне в славнем сонме Российских новомучеников на Небеси возсияла еси, непрестанно молящися о всех нас, с любовию почитающих тя.

Ин тропарь, глас 4:
Воскресенско-Феодоровския обители украшение, земли Ивановския покров и защищение, Православныя Церкве похвало, преподобномученице мати Арсение, славная исповеднице веры Христовы, предстоящая ныне пред Престолом Господа, не остави нас, во зле погибающих, моли Его спасти души наша, страстьми одержимыя, и оставление грехов даровати нам.

Ин тропарь, глас 5:
Избраннице Царицы Небесныя, мученице и угоднице Христова Арсение, не остави обитель свою и люди своя, с любовию почитающия светлую память твою, яко имаши дерзновение ко Господу от всяких нас бед и болезней свободи и моли Милостиваго Бога помиловати нас, молящихся тебе, и спасти души наша.

Кондак, глас 5:
Любве ради Христовы мир оставила еси, мати богомудрая, паче земнаго богатства избрала еси богатство небесное, явила еси нам образ терпения и кротости, во иночестем житии смиренно подвизающися, страдание и смерть неповинную от власти пребеззаконныя претерпела еси, темже дерзновение у Всещедраго Бога стяжала еси, преподобномученице Арсение, Егоже моли, да спасет души наша.

Величание
Величаем тя, страстотерпице Христова Арсение, и чтим честная страдания твоя, яже за Христа претерпела еси.