Кондак 1
Избранному угоднику, дивному пред Богом предстателю, града Брянска покровителю князю Олегу пресветлому принесем похвалы, яко присному душ наших заступнику и теплому нашему молитвеннику: ты же, о звездо пресветлая, осиявай нас неоскудно, да избавльшеся от бед и скорбей, со умилением вопием ти:
Радуйся угодниче Божий княже Олеже, града Брянска чудотворче.

Икос 1
Ангела образом, аще и человека естеством, яви тя небесе и земли Создатель, от благочестиваго бо корене Михаила Страстотерпца, великаго князя земли Черниговския, яко отрасль пречестную произрастившаго, ходатаем града Брянска тя содела. Темже житие и подвиги твоя чтуще, Олеже святе, согласно вопием ти:
Радуйся, благочестивых родителей плоде богодарованный.
Радуйся, розго благовернаго Михаила, стяжавшаго мученический венец.
Радуйся, достохвальне подражателю черноризцев чиноначальницы, дщере Михаиловы, преподобныя Евфросинии Суждальския.
Радуйся, от младенческих пелен в жилище Духу Святому предуготованный.
Радуйся, яко еси от сонма святых князей Российских Богом избранный.
Радуйся, несокрушиму веру явивый в себе.
Радуйся, любовию ко Христу еще в юности пламеневый.
Радуйся, яко образ незлобия и смирения даже до конца показавый.
Радуйся, подвижническаго венца от младости возжелевый.
Радуйся, добродетелей сокровище пребогатое.
Радуйся, подвигов иноческих исполнение превысокое.
Радуйся, угодниче Божий княже Олеже, града Брянска чудотворче.

Кондак 2
Видя умныма очима зраки предков твоих, Михаила во орде от Батыя за Христа смерть приявшаго и Евфросинии преподобныя, паче всех постниц Российских просиявшия, потщался еси, благоверне княже Олеже, подражати сим, аще и млад был еси: мы же, прославляюще Бога, о тебе дивно произволивша, воспеваем: Аллилуиа.

Икос 2
Разум богопросвещенный от юности стяжавая, к небесным чистыя помыслы устремил еси, сердце и слух склонил ко гласу обидимых и безпомощных, милосердие и любовь к бедным и сирым явив: сего ради приими от нас сицевая:
Радуйся, милости издетска преисполненный.
Радуйся, печальных благий утешителю.
Радуйся, вдов и сирот питателю.
Радуйся, в бедах сущым предстателю.
Радуйся, скорбных сердец целителю.
Радуйся, смиреннаго отрочества Христова подражателю.
Радуйся, родителей и знаемых свято почитавый.
Радуйся, сверстником твоим пример благонравия подававый.
Радуйся, от грехов и страстей свободу улучивый.
Радуйся, многоплодный клас веры в души твоей произрастивый.
Радуйся, благоговейное отроча, снискавшее дары страха Божия и благочестия.
Радуйся, угодниче Божий княже Олеже, града Брянска чудотворче.

Кондак 3
Силою благодати Духа Святаго укрепляемь, блаженне княже Олеже, вознамерился еси, прияв крест, последовати Христу, егда иноцы Печерстии принесоша во град Брянск образ Пресвятыя Богородицы, сущу недугующу родителю твоему, благоверному князю Роману. Сего ради Господь, испытуяй сердца и утробы, свыше благослови тя, зовуща Ему: Аллилуиа.

Икос 3
Имея едино помышление в сердцы твоем, еже послужити Христу, плотское мудрование отложил еси, и яко воин благоискусен, броню спасения стяжа, да ратуеши на враги невидимыя. Темже ублажаяюще твое изволение, вопием ти сице:
Радуйся, носителю благодати Духа Всесвятаго.
Радуйся, образе нищеты духовныя.
Радуйся, оградивыйся несокрушимым щитом веры.
Радуйся, приявый непобедимое оружие Животворящий Крест Христов.
Радуйся, древняго благочестия блюстителю.
Радуйся, отеческих подвигов ревнителю.
Радуйся, светом благоразумия осиянный.
Радуйся, преподобием и кротостию увенчанный.
Радуйся, яко еси благовонное Богу молитвы кадило.
Радуйся, Отечества нашего дивное прозябение.
Радуйся, рода князей Российских украшение.
Радуйся, угодниче Божий княже Олеже, града Брянска чудотворче.

Кондак 4
Буря страстей и треволнений житейских не возможе поколебати тя, преблаженне княже Олеже, обаче научи благоискусно искати пристанище спасения твердое: темже сугубо возсия в души твоей нетленная красота безстрастия, угодная Вседетелю Богу, Емуже воспевал еси: Аллилуиа.

Икос 4
Слышав сестру твою единоутробну, княгиню земли Волынския Ольгу, глаголющу, яко умершу мужеви ея, един есть жребий на земли прияти образ иноческий, сам поревновал еси твоея сестры произволению, и перве в вертограде родителей твоих уединенно водворился еси, последи же, прияв и сам иноческое пострижение, отшел еси на место, ти реченное, да тамо мирно Господеви поработаеши: мы же образу мужества духовнаго дивящеся, восхваляем тя сице:
Радуйся, презревый славу и власть наследственную.
Радуйся, сокрушивый тщеславие и гордыню.
Радуйся, земныя почести нивочтоже вменяяй.
Радуйся, царствия горняго иский.
Радуйся, отречением высокая стяжавый.
Радуйся, труды ко трудом, посты ко постом прилагавый.
Радуйся, яко молитвами и бдением Царство Небесное улучил еси.
Радуйся, яко иго благое на рамо подъял еси.
Радуйся, от младости на вся подвиги иноческия укрепивыйся.
Радуйся, невинности сосуде.
Радуйся, уединения цвете.
Радуйся, угодниче Божий княже Олеже, града Брянска чудотворче.

Кондак 5
Светоносну лучу уподобился еси, преподобне княже Олеже, егда познав, яко велия блага можеши принести Отечеству, и во образе иночестем, на месте пустынне поселился еси: благоприятно бо бысть Творцу твое хотение, во еже работати Ему в преподобии и выну пети песнь: Аллилуиа.

Икос 5
Видевше благолюбивии людие града Брянска праведное по Бозе житие твое, славляху тя и попремногу чествоваху щедроты и подвиги твоя. Ты же смирение истинное возлюбив и похвалы человеческия пренебрег, гордынею не уязвлен пребыл еси. Сего ради с любовию приносим ти таковая:
Радуйся, возлюбивый святыню Дома Божия.
Радуйся, в телеси твоем живый храм Духу Святому уготовивый.
Радуйся, древним пустынножителем добре подражавый.
Радуйся, в посте и молитвах выну пребывавый.
Радуйся, христоименитым людем благочестия учителю.
Радуйся, рабов Божиих усердный служителю.
Радуйся, яко непрестанным бдением безплотным уподобился.
Радуйся, яко ничтоже суетно тебе приразися.
Радуйся, воздержания наставниче.
Радуйся, постниче достолюбезне.
Радуйся, сластолюбцев посрамление.
Радуйся, угодниче Божий княже Олеже, града Брянска чудотворче.

Кондак 6
Проповедник веры православныя и ревнитель благочестия словом и житием был еси, благоверне княже Олеже: единым бо желанием горя, да всех во граде твоем приведеши ко Христу и научиши вкупе с тобою воспевати ему: Аллилуиа.

Икос 6
Возсиял есть в дебрех град Брянск окрест облежащих яко утренняя заря и яко звезды небесныя озариша добродетели твоя вся тамо жившыя, о нихже и ныне никтоже умолчит прославляти тя сими похвальными словесы:
Радуйся, яко столп огненный во тме греховней заблуждшым возсиявый.
Радуйся, путь шествующым по тебе от земли на небо показавый.
Радуйся, наставниче иноков пустыннолюбивых.
Радуйся, пастырю, пасый на пажитех живоносных.
Радуйся, благодати чистая струе.
Радуйся, страны Брянския славо и утверждение.
Радуйся, маслино, елей милостей Господних источающая.
Радуйся, лозо, упованием обетований непреходящих напояющая.
Радуйся, зерцало умиления.
Радуйся, хранилище отречения.
Радуйся, яко токи богодухновенных учений излиял еси.
Радуйся, угодниче Божий княже Олеже, града Брянска чудотворче.

Кондак 7
Хотяй достойне подвигом добрым подвизатися и веру нераздельну со святыми соблюсти, первее укрепил еси ум чтением божественных словес и житий отеческих, таже навыкл еси подражати подвигом святых, последиже вся временная во уметы вменил и богатства многая оставил еси, нищ и убог пребывая, да непреткновенно приносиши Богу песнь: Аллилуиа.

Икос 7
Новая Фиваида явися ти, преподобне княже Олеже, добрь Брянская, в нейже обители во имя Первоверховных Апостол основание положи: тамо бо храм мал и келлии убоги создав, велиими труды и бдением непрестанным украси равноангельное твое житие, пением же, пощением и молитвами образ быв твоим учеником. Сего ради приими отче преподобне, сицевая:
Радуйся, багряницу княжескую на власяницу иноческую вольне пременивый.
Радуйся, постом, бдением и молитвами Христу Богу добре угодивый.
Радуйся, яко обитель и храм во имя святых Апостол воздвигл еси.
Радуйся, яко пристанище благоотишное пловцем моря житейскаго уготовал еси.
Радуйся, скверны греховныя избежавый.
Радуйся, сугуб плод совершенства стяжавый.
Радуйся, неусыпнаго бдения учителю.
Радуйся, трезвения умнаго и безмолвия любителю.
Радуйся, ради Господа вся красная мира презревый.
Радуйся, пламень страстей попаляяй.
Радуйся, росо, душы верныя услаждающая.
Радуйся, угодниче Божий княже Олеже, града Брянска чудотворче.

Кондак 8
Странно и дивно бысть житие твое, преподобне, в обители, егда последуя угоднику Божию Феодосию, Лавры Печерския начальнику, сам быв игумен, вся послушания яко раб исполняше, бдя неусыпно, во власяницу и вретище одевашеся, вмале на древянне ложи покой имея, паче же на всяк час неустанно вопия Богу: Аллилуиа.

Икос 8
Весь равною ко всем горя любовию, достохвальне княже Олеже, наставляше братию обители твоея, да вси едино будут во благочинии, несении обетов иночества, служении церковнем, чтении и пении: того ради подвигаеши согласно звати тебе сице:
Радуйся, теплою молитвою прибегающих к тебе от зол ограждаяй.
Радуйся, бедствующым многомощне помогаяй.
Радуйся, посетителю в немощех сущих.
Радуйся, заступниче в напасти впавших.
Радуйся, яко иноков добре наставляеши.
Радуйся, яко о всех чадех Церкве Господа умоляеши.
Радуйся, путеводителю дивный.
Радуйся, вождю духовных воинов благоискусный.
Радуйся, благочестия столпе.
Радуйся, скорбных сердец врачевателю.
Радуйся, Российскаго иночества насадителю.
Радуйся, угодниче Божий княже Олеже, града Брянска чудотворче.

Кондак 9
Естеству ангельскому подражая, всякия беды, скорби и напастей избавлял еси, преподобне княже, приходивших к тебе с верою, временная блага яве и тайне в нуждах сущым разделяя, да купно с тобою вси Всещедрому Богу возглашают: Аллилуиа.

Икос 9
Витийство человеческое не довлеет достойне восхвалити тя, преславне княже Олеже, многа бо моления и пощения в животе твоем совершил еси, неисчетны слезы и воздыхания ко Господу принесл еси, дивныя подвиги сотворил еси: обаче мы от простоты сердца, любовию подвизаеми, возглашаем ти таковая:
Радуйся, славословием немолчным ангелом уподобивыйся.
Радуйся, неусыпающым молитвенником сопричтыйся.
Радуйся, на враги видимыя и невидимыя нам споборниче.
Радуйся, преподобных и праведных сонаследниче.
Радуйся, яко в скиниих райских торжествуеши.
Радуйся, яко во обители Отца Небеснаго ликовствуеши.
Радуйся, луче триипостаснаго света.
Радуйся, деннице Церкве Российския.
Радуйся, святости крине.
Радуйся, спасения гласе.
Радуйся, горлице духовная, весну грядущаго века показующая.
Радуйся, угодниче Божий княже Олеже, града Брянска чудотворче.

Кондак 10
Спасти хотя душу свою, пример благий показал еси, святе Олеже, имже вся ны учиши нерадити о плоти и суетах мирских, неленостно же искати богоугождения: помози убо нам подражати тебе в сем непрестанно, да обыкнувше украшатися добродетелми, воспоем умильно Господеви: Аллилуиа.

Икос 10
Стена тверда и заступление был еси, благоверне княже Олеже, всем иноком обители твоея: ового бо отечески назидаше, ового кротце обличаше, иныя с любовию увещавая, оныя грозно осуждая наипаче же пред кончиною твоею вся ко спасению потребная заповедал еси им. Темже и нас убогих упаси добре, и надеждею крепкою нам буди, да зовем ти сладце:
Радуйся, оградо собраннаго тобою стада духовных овец.
Радуйся, вождю, путь верный указуяй.
Радуйся, щите крепкий, присно ны защищаяй.
Радуйся, мечу Божий, злая и душевредная посекаяй.
Радуйся, кормчию хотящих спастися.
Радуйся, необуреваемое пристанище житейскаго плавания.
Радуйся, горняго мира украшение.
Радуйся, дольняго мира ограждение.
Радуйся, благодеяния многа источаяй.
Радуйся, милостию твоею вся покрываяй.
Радуйся, со святыми на небеси вечно царствуяй.
Радуйся, угодниче Божий княже Олеже, града Брянска чудотворче.

Кондак 11
Пение немолчное принесл еси Пресвятей Троице в час кончины твоея, достохвальне княже Олеже: «Хвала Богу благодействующу, — глаголал еси, возлежа на смертнем одре, — зрю уже брег моря житейскаго, имже доселе ношашеся моя утлая ладия». Темже со упованием радостно пришел еси во обители горния, идеже со ангельскими лики поеши песнь великую: Аллилуиа.

Икос 11
Яко светоприемную свещу, углем благодати возжженную, видеша ученицы лице твое, угодниче Божий, в час кончины светом невечерним осиянное: сего ради скорбь разлучения с тобою дивным сим утешением растворивше, с трепетом и радостию взираху на пречестныя мощи твоя, и отшествие твое прославиша звании сими:
Радуйся, по трудех временных покой вечный улучивый.
Радуйся, земное течение достохвальне скончавый.
Радуйся, венец безсмертныя жизни приявый.
Радуйся, Престолу Вседержителя ныне предстояй.
Радуйся, добродетельми мирови светяй.
Радуйся, святынею твоею град наш присещаяй.
Радуйся, иночествующым образ добрых подвигов подаваяй.
Радуйся, яко лучи невечерняго света лик твой озариша.
Радуйся, яко в ризы нетления честнии мощи твоя облекошася.
Радуйся, лампадо небеснаго блистания.
Радуйся, горнило молитвеннаго курения.
Радуйся, угодниче Божий княже Олеже, града Брянска чудотворче.

Кондак 12
Благодать и милость испроси нам у Христа, Владыки нашего, благоверне княже Олеже, окорми предстательством твоим, отжени от нас всякаго врага и противника, научи подражати тебе, да избавльшеся искушений, прелести и бед, прославляем тя по достоянию, воспевая песнь благодарения: Аллилуиа.

Икос 12
Поюще подвиги дивнаго жития твоего и честное преставление твое, угодниче Божий Олеже, чтим память твою вси, яко небеснаго предстателя и помощника, от Господа нам дарованного: ты же и по преставлении град твой не оставляяй, посети милостию приносящих ти похвалы сицевыя:
Радуйся, во славе от земли на небо преселивыйся.
Радуйся, лику избранных тамо приобщивыйся.
Радуйся, стране нашей на враги споборствуяй.
Радуйся, воинству нашему во бранех способствуяй.
Радуйся, яко пределы Отечества нашего неусыпно защищаеши.
Радуйся, яко град Брянск и обитель тобою созданную, присно покрываеши.
Радуйся, воине Царя царствующих.
Радуйся, князей Российских доброто.
Радуйся, боголюбивым душам благодати подателю.
Радуйся, молитвениче наш усердный.
Радуйся помощниче наш скорый.
Радуйся угодниче Божий княже Олеже, града Брянска чудотворче.

Кондак 13
О пречудне и преславне угодниче Божий, благоверне княже Олеже, приими сие малое хваление от недостойных раб своих: огради обитель твою и молитвами твоими сохрани от враг видных и невидимых, от недугов и скорбей, от смертоностныя язвы и грядущия муки, да и ныне и во веки веков воспеваем Богу: Аллилуиа.
Этот кондак читается трижды, затем икос 1-й и кондак 1-й

Молитва святому благоверному князю Олегу Брянскому
О пречудный отче, благоверный княже Олеже, угодниче Христов усердный, молитвенниче ко Господу теплый, защитниче в бедах и утешителю в печалех неусыпный! Воззри, преблаженне, молитвенно на град твой и виждь чада твоя, смиренно к тебе припадающая и служите тебе хотящая. Не отвергни требующыя твоея помощи, но яко благодетель и ходатай, моли присно Господа Бога и Спаса нашего Иисуса Христа, да благословит страну Российскую, в мире и благоверии ю сохраняя, грады умножая, достояние свое соблюдая. Вознеси, богоносне отче наш, сие малое моление недостойных раб твоих Владыце Христу, да утвердит во Святей Православней Церкви живый дух правыя веры и любве, благочестие непоколебимо, любомудрие Христопоследовательно: да дарует Господь пастырем ревность попечения о спасении людей, во еже неверущыя просветити, заблудшыя наставити, отпадшыя обратити и привлещи; изряднее же да вся чада Церкве Православныя чиста сохранит от мирских искушений, похотей плотских, суемудрия суеверий и наваждений вражеских. Ей, угодниче Божий, не презри нас, молящихся тебе, но помози нам скорым предстательством твоим, да всяких бед, напастей и скорбей в сей жизни временней избежавше, кончину непостыдну обретем, и тако на земли богоугодно поживше, жизни райския на небеси сподобимся, идеже вкупе с тобою прославим человеколюбие и щедроты в Троице славимаго Бога Отца, Сына и Святаго Духа, во веки веков. Аминь.

Тропарь преподобному и благоверному князю Олегу Брянскому, в иночестве Леонтию
Тропарь, глас 8:
От юности возлюбив Христа всем сердцем, преподобне, славу земную, яко преходящую, оставил еси и царство земное в ничтоже вменивше, лику инок радостно причелся еси и труды многими град Брянск, аки солнце пресветло, озарил еси. Тем быв Троицы украшение, моли, княже Олеже, Христа Бога спастися душам нашим.

Кондак, глас 4:
Уподобился еси плодоносней леторасли от корене честнаго, Олеже благородне, истину возлюбив и нетленный Христов живот. Темже молитвою и пощением светильник великий быв твоим учеником, просвети, блаженне, Отечество твое и спаси души наша.

Величание
Ублажаем тя, святый благоверный княже Олеже, и чтим святую память твою, ты бо молиши за нас Христа Бога нашего.