Павлу Обнорскому, Вологодскому

Кондак 1
Избранный и дивный во святых, отче наш Павле, от Христа Бога дар чудес обильно приемый! похвальная приносим ти ныне любовию чтущии тя: ты же, яко имея дерзновение многое ко Святей Троице, моли избавитися от всяких бед верно хвалящым тя:
Радуйся, Павле преподобне, пустынный жителю.

Икос 1
Ангела земнаго и небеснаго человека яви тебе всех Создатель, и благоплодную душу твою из млада провидев, преподобне Павле, научи всех вопити тебе сице:
Радуйся, чистое Святаго Духа приятелище;
Радуйся, ангельским ликом собеседниче.
Радуйся, любве ради Христовы преименитый град отечества твоего оставивый, и в пустынях со зверьми жити изволивый;
Радуйся, древо благосеннолиственное, при исходищах вод насажденное.
Радуйся, яко плод присноцветущь послушания принесл еси;
Радуйся, яко терпением твоим вся страсти плотския умертвил еси.
Радуйся, яко крестным знамением лукавых духов далече от тебе отгнал еси;
Радуйся, столпе, житейскими бурями непоколебимый.
Радуйся, яко до ныне обильную реку исцелений источаеши;
Радуйся, яко о благоденствии властей наших Господа Бога умоляеши.
Радуйся, яко обитель твою и нас рабов твоих в молитвах твоих не оставляеши;
Радуйся, яко скорбящым в недугах исцеление подаваеши.
Радуйся, Павле преподобне, пустынный жителю.

Кондак 2
Видяще свет добродетелей твоих отче наш Павле, душами и телесы просвещаемся, и дивнаго тя во святых чудотворца почитающе, чудесам твоим, по благодати Божией от тебе бывающым, удивляемся, и во умилении сердца Богу вопием: Аллилуиа.

Икос 2
Разум недоразуменный от юности уразумевая Божественными учении, еже бы улучити восход от земных в небесная, сего ради презрев все плотское мудрование, и возжелав весь жити Христу, в непроходимую пустыню вселився, в трудех и бдениих подвизался еси: сего ради глаголем тебе отче наш Павле, таковая:
Радуйся, яко Христово смирение вельми возлюбил еси;
Радуйся, яко нищету духовную во всем соблюл еси.
Радуйся, яко Крест Христов на раменах твоих без роптания носил еси;
Радуйся, яко жестокое житие на земли показал еси.
Радуйся, яко и учителя твоего великаго Сергия тем утешил еси;
Радуйся, яко братии твоей образ великих добродетелей был еси.
Радуйся, яко правым путем выну шествуя вход в Царство Небесное улучил еси;
Радуйся, яко тамо со Ангелы водворяяся предстоиши Святей Троице во мнозем дерзновении.
Радуйся, воздержания и чистоты истинный хранителю;
Радуйся, смиренномудрия и кротости присный блюстителю.
Радуйся, светоносный светильниче Божия благодати;
Радуйся, храме Бога Живаго одушевленный.
Радуйся, Павле преподобне, пустынный жителю.

Кондак 3
Силою, свыше ти дарованною, всяку слезу от очес зле страждущих отъяти готов сый, богоносе отче Павле, был еси болезнующым исцеления податель, и по смерти твоей великий помощник всем показался еси, вопиющым Богу: Аллилуиа.

Икос 3
Имея поспешествующую тебе Божию силу, отче наш Павле, добродетельми украсился еси и ангельски пожил еси: темже мы смиреннии, любовию к тебе понуждаеми, глаголем сице:
Радуйся, Ангелов собеседниче;
Радуйся, преподобных и праведных сопричастниче.
Радуйся, чистое и честное жилище святыни;
Радуйся, великих добродетелей вместилище.
Радуйся, яко ярем Господень на себе восприяти усердно восхотевый;
Радуйся, яко от млада возраста в дому Божием пребывати возжелавый.
Радуйся, яко и Господь желания твоего не отринул есть;
Радуйся, яко и на небесех мзду трудов твоих обрел еси.
Радуйся, яко ныне во свете святых пребываеши;
Радуйся, яко выну Господа Сил созерцаеши.
Радуйся, яко со ангельскими чинми трисвятую песнь воспеваеши;
Радуйся, невещественным светом Трисияннаго Божества озаренный.
Радуйся, Павле преподобне, пустынный жителю.

Кондак 4
Буря помышлений страстных обдержит ны: но воздержанием и трудами уморивый страсти и волнений множество укротивый, отче наш Павле, моли избавитися от напастей и нам, чтущым тя, да припадая во умилении душ и сердец наших к дивному Богу, прославляемому во святых своих, выну воспеваем: Аллилуиа.

Икос 4
Слышаша ближнии и дальнии величие чудес твоих, авво наш Павле, яко скорый еси в бедах и обстояниих помощник, и яко на крилех повсюду являешися призывающым тя по имени в молитвах своих, и вопиющым к тебе:
Радуйся, твердое в печалех утешение;
Радуйся, скорбящих недремленное попечение.
Радуйся, всяких недугов и болезней безмездный целителю;
Радуйся, в напастех и бедах скорый подателю помощи.
Радуйся, велия пучина сокровищ богатства душевнаго;
Радуйся, скорбных и бедне живущих небесное утешение.
Радуйся, неоскудеваемая пище алчущым правды;
Радуйся, источниче неисчерпаемый пития духовнаго.
Радуйся, ненадеждных крепкое надеяние;
Радуйся, верный кормчий в мори плавающих.
Радуйся, яко молитвами твоими от страстей избавляемся;
Радуйся, яко от цельбоносных твоих мощей сладости духовныя исполняемся.
Радуйся, Павле преподобне, пустынный жителю.

Кондак 5
Боготечная звезда во странах сих явился еси, преподобне отче Павле, и непроходимую пустыню светом богоугоднаго жития твоего озарил еси, и вся верныя, назидатися к тебе приходящыя, всегда поучал еси в Троице Святей славимому Богу пети сице: Аллилуиа.

Икос 5
Видеша корыстолюбивии человецы, татие и хищницы, яко не токмо во обители твоей святей на расхищение приступити несть возможно, но и стад твоих, вне ограды пасущихся, жезлом твоим, блаженне отче Павле, ограждаеши, дерзнувших же на сие, слепотою и разслаблением поражая, в раскаяние и ужас приводиши, и тем всех богобоязненных возставляеши глаголати тебе таковая:
Радуйся, неусыпный обители твоей хранителю;
Радуйся, бодрый пастырю, выну пекущийся о чадах твоих.
Радуйся, пустынножителю бодрственный, вся видимая и невидимая злая побеждающий;
Радуйся, монашествующих спасения ходатай усерднейший.
Радуйся, братии твоей в бедах и обстоянии варварском сущей утешителю скорый;
Радуйся, нещастных защитниче предивный.
Радуйся, смирения и кротости насадителю;
Радуйся, мирских нравов из братии твоей искоренителю.
Радуйся, плотския и духовныя нищеты любителю;
Радуйся, гордости и великолепия мирскаго потребителю.
Радуйся, целомудрием и кротостию, яко многоценною багряницею, одеялся еси;
Радуйся, правдою и чистотою, яко светлым венцем, венчался еси.
Радуйся, Павле преподобне, пустынный жителю.

Кондак 6
Проповедает вся великая Россия о тебе, авво Павле, яко ты еси скорый податель исцеления недугующым, и разслабенным и ума лишенныя и и беснующыяся молитвами твоими к Богу, здравы сотворяеши. Буди же и о нас смиренных рабех твоих всегдашний молитвенник ко Спасу, к немуже воспеваем песнь выну славословимую: Аллилуиа.

Икос 6
Возсиял еси во стране Вологодстей, яко солнце пресветлое, преподобне отче наш Павле, уясняя сердца верных добродетельми твоими, и яко луча огнесиянная теплотою молитв твоих всех скорбных и больных оживляеши: сего ради мы, сошедшеся при гробе твоем, благодарственно вопием ти таковая:
Радуйся, светильниче всесветлый повсюду чудесы твоими осиявающий;
Радуйся, свете освещающий потемненныя лютыми страстьми.
Радуйся, цвете сельный, благовонием Духа Святаго напоенный;
Радуйся, божественных заповедей усерднейший ревнителю.
Радуйся, апостольских и отеческих преданий твердый хранителю;
Радуйся, Церкви Российския великое украшение.
Радуйся, яко финикс в пустыне сей процвел еси;
Радуйся, яко кедр долголетний на горах сих прославился еси.
Радуйся, яко присный отец о братии твоей промышлял еси;
Радуйся, яко выну в законе Господнем поучатися наставлял еси.
Радуйся, яко и во успении твоем нас не оставляеши;
Радуйся, яко о оставлении грехов наших Господа Бога умоляеши.
Радуйся, Павле преподобне, пустынный жителю.

Кондак 7
Хотящу игумену с братиею открыти гроб твой, и видети святыя мощи твоя, преподобне отче Павле, в сонном видении представ, со гневом рекл еси им: оставите таковое тщетное дело, да не огнь снидет с небеси и пожжет вы; мы же слыша таковая, яко непотребнии со страхом и трепетом припадающе к раце цельбоносных мощей твоих, молим тя о милости твоей, вопиюще Богу: Аллилуиа.

Икос 7
Новаго тя Илию Фесвитянина, новаго тя Иоанна Крестителя, новаго тя Моисеа Боговидца познаваем, священнейший отче наш Павле, всю бо жизнь твою в непрестаемем посте и смиренномудрии, в деннонощных молитвах и коленопреклонениях, в нищете и наготе, в трудах и бдении провел еси; сего ради и Господь управи тя в пустыню сию, яко в обетованную землю, юже множеством последующих тебе в преславный град обратил еси, тем и вопием тебе ныне таковая:
Радуйся, пустынный предобрый гражданине;
Радуйся, духовный купец, обретший многоценен бисер Христа Иисуса Сладчайшаго.
Радуйся, мудрый путеводителю, управляющий стадо твое от земли на горняя;
Радуйся, известный охранителю бедствующих в пустыне сей греховней.
Радуйся, истинный проповедниче покаяния;
Радуйся, искусный кормчий плавающих в пучине житейских страстей и попечение.
Радуйся, яко крестным знамением, аки мечем обоюду острым, безстудныя помыслы от диавола тебе находящыя посекл еси;
Радуйся, яко и от человек жезлом твоим бесы во адскую бездну низвергаеши.
Радуйся, светило, страну сию прежде непроходимую, собою просвещающее;
Радуйся, звездо, греховную тьму, таящуюся в нас, светом учения твоего рагоняющая.
Радуйся, угодниче Христов, дивный в чудесех и по отшествии твоем от мира сего лукаваго;
Радуйся, яко и мы тобою мир с Богом имамы.
Радуйся, Павле преподобне, пустынный жителю.

Кондак 8
Странное и велие чудо является притекающым к раце мощей твоих, блаженне отче Павле, пред ними бо и малое моление тебе приносяще, всяких болезней исцеление приемлем и в благоверии утверждающеся, упование на тя возлагаем, выну вопиюще Богу: Аллилуиа.

Икос 8
Всем вся был еси, и ныне являешися, да всяко некия спасеши, по слову тезоименнаго ти Апостола, богоносе отче Павле, и никакоже отступил еси от созданныя тобою обители, но поучением и наставлением наказуеши собранная чадатвоя, глаголющыя и ныне тебе таковая:
Радуйся, спасение и заступление наше у Бога;
Радуйся, всем притекающым к раце мощей твоих вернаго исцеления подателю.
Радуйся, яко любы нелицемерную к Богу и ближнему стяжавый;
Радуйся, яко тем апостол и пророк законную главизну исполнивый.
Радуйся, яко учению тезоименнаго апостола Павла во всем последовал еси;
Радуйся, яко от млада возраста Бога познал еси.
Радуйся, яко от него словесных овец, извествованный учителем твоим Сергием, пастырь устроен был еси;
Радуйся, яко в нищете и бедности от Господа прославленный.
Радуйся, яко мраз и хлад терпеливно понесл еси;
Радуйся, яко вся воздушныя перемены непоколеблемо претерпел еси.
Радуйся, яко все внешнее злострадание без роптания восприял еси;
Радуйся, яко дупленым древом, аки лествицею, на небо возшел еси.
Радуйся, Павле преподобне, пустынный жителю.

Кондак 9
Весь предался еси Вседержителю, отче наш Павле, егда тя распали божественное желание, и егда в горняя весь ум твой впери; сего ради оставив родителей твоих и все стяжание мирское в ничтоже вменив, последовал еси учению Христову, выну поя священную песнь: Аллилуиа.

Икос 9
Витий суемудренных богопротивному учению не последовав, треблаженне отче наш Павле, истинный ученик апостолов был еси, житием твоим в православней вере паче и паче утверждая, и чудесами твоими удивляя всех, глаголющих тебе таковая:
Радуйся, насадителю благочестия;
Радуйся, искоренителю нечестивых и дел их посрамителю.
Радуйся, подражателю ликом ангельским в песнопении духовном;
Радуйся, богоносных и великих отец подвигам и трудам последователю усерднейший.
Радуйся, яко и духовнаго отца твоего бдением и молитвою удивил еси;
Радуйся, яко от него в святости жития свидетельствованный.
Радуйся, непроходимыя пустыни светильниче всесветлый;
Радуйся, пустынножителей лепотное украшение.
Радуйся, яко дивии звери пред тобою аки агнцы кротци бываху;
Радуйся, яко хищнии птицы от руки твоея пищу небоязненно приимаху.
Радуйся, яко всем вся нужная от тебе требующым подавал еси;
Радуйся, яко и ныне притекающии к тебе с молением нетщи отходят.
Радуйся, Павле преподобне, пустынный жителю.

Кондак 10
Спасти хотя братию обители твоей, отче наш Павле, от нахождения варвар, представ им в сонном видении укреплял вся страдания сносити терпеливно, обещавая за сие воздаяние небесное; сего ради и мы твои ученицы, якоже и они, да не постраждем от невидимых враг подобное, молим тебе не оставити нас, и молящеся умиленно глаголем Богу Аллилуиа.

Икос 10
Стена еси тверда и оплот нерушим восхваляющым, блаженне Павле, болезни и труды твоя и всем требующым в бедах и напастех твоего заступления; темже и нас, немоществующих грехи многими и всякаго блага лишенных, заступи молитвами твоими, со усердием тебе вопиющих таковая:
Радуйся, указателю пути праваго;
Радуйся, вождю и законоположителю пустынножителей.
Радуйся, дерзостно правил твоих несоблюдающих наказателю;
Радуйся, присный молитвенниче о поминающих честную память твою.
Радуйся, в нуждах и бедах преславный заступниче;
Радуйся, в напастех и скорбех скорый защитниче.
Радуйся, маслина в дому Божием насажденная;
Радуйся, красныя плоды добродетелей произращающая.
Радуйся, благопрозябший грозде винограда Христова;
Радуйся, сладосте духовная, искапающая вино, сердца верных веселящее.
Радуйся, от Безначальнаго Отца, единородна Слова несозданна, и Святаго Духа сиянием просвещенный;
Радуйся, яко в дуплене древе на камени Божественныя веры сердцем и душею твердо укрепленный.
Радуйся, Павле преподобне, пустынный жителю.

Кондак 11
Пение всеумильное принося Пресвятей Троице, богоизбранный отче Павле, храм преславен честь Ея воздвигл еси, в нем же и ныне приносится безкровная жертва, о возвышении и укреплении Российскаго государства и Церкви, о низложении супостатов, и о спасении всех православных христиан, вопиющих Богу:Аллилуиа.

Икос 11
Светозарною звездою в непроходимей сей пустыни сияяй, Богоносе Павле, яко многорастительный финикс в дому Святыя Троицы процвел, и яко сад живоносен всем притекающым к раце мощей твоих был еси; сего ради и глаголем ти таковая:
Радуйся, поборниче православия;
Радуйся, храме Трипостаснаго Божества одушевленный.
Радуйся, луча, озаряющая сущыя во мраке жития плотскаго;
Радуйся, светоподательный светильниче сущым во тьме неразумия.
Радуйся, деннице пресветлая, возвещающая всем грешным покаяние;
Радуйся, цевнице духовная, услаждающая чувства сладкопением небесным.
Радуйся, источниче приснотекущий жаждущым вечныя жизни;
Радуйся, кладезю воды живыя, всем исцеление подавающий.
Радуйся, каменю пустынный, источающий мед и млеко от неверия обращенным;
Радуйся, свеще, пламенем Божественныя любви возженная.
Радуйся, яко в горах, в пустынях и островех каменных всякое неприязненное искушение доблественно победил еси;
Радуйся, яко за сие благорасленными Божественнаго рая цветы украсился еси.
Радуйся, Павле преподобне, пустынный жителю.

Кондак 12
Благодатию Божественною осеняем, просиял еси в животе твоем, богоносе отче Павле, якоже всесветлое солнце в мире, и во успении твоем с верою и любовию к раце мощей твоих притекающия не оставляеши, и глаголющия Богу: Аллилуиа.

Икос 12
Поюще твоя чудеса, преподобне отче Павле, воспеваем прославльшаго тя Бога, в Троице Святей покланяемаго, и молим Его научити нас славити и глаголати тебе таковая:
Радуйся, истинный и верный поклонниче Бога Вышняго;
Радуйся, неложных заповедей Его хранителю.
Радуйся, церковный строителю неоскудный;
Радуйся, церковное украшение и истины поборниче.
Радуйся, неусыпный исполнителю отеческих преданий;
Радуйся, верный всего священнаго почитателю и ревнителю неуклонный.
Радуйся, яко вся мирския волны страстей теплым желанием безстрастия укротил еси;
Радуйся, яко вся губительная демонская коварства всеоружием крестным попрал еси.
Радуйся, яко сугубу мзду ради трудов твоих от Бога приял еси;
Радуйся, яко пресветел венец ради трудов твоих от руки Господней восприял еси.
Радуйся, покланяющихся раце мощей твоих заступление;
Радуйся, святей обители твоей утверждение, и нам почитающым тя спасение.
Радуйся, Павле преподобне, пустынный жителю.

Кондак 13
О добрый наш пастырю и учителю! О великий чудотворче, преподобне отче Павле! Приими сие наше малое хваление, и моли Царя царствующих властем нашим мир и благоденствие подати, воинству же на враги победу и одоление, нам же почитающым тя и всем православным христианом спасение и в болезнех исцеление, и молитвами твоими изми нас будущия муки, да выну воспеваем Богу победную песнь: Аллилуиа.
Этот кондак читается трижды, затем икос 1-й и кондак 1-й

Молитва преподобному отцу нашему Павлу, Обнорскому чудотворцу
О добрый наш пастырю и богомудрый наставниче, преподобне отче Павле! Услыши нас грешных, молящихся тебе и призывающих в помощь скорое предстательство твое; виждь нас грешных, в толицех обстояниих сущих, виждь нас немощных отвсюду уловляемых, всякаго блага лишенных и умом от малодушия помраченных; потщися, угодниче Божий, не оставити нас в греховном плену быти, да не будем в радость врагом нашым и не умрем в лукавых деяниих наших. Моли о нас недостойных Содетеля нашего и Владыку, Емуже ты со безплотными лики предстоиши. Милостива к нам сотвори Бога нашего в нынешнем веце и в будущем, да не воздаст нам по делом нашым и по нечистоте сердец наших, но по своей благости воздаст нам; на твое бо ходатайство уповая, твоим предстательством хвалимся, твое заступление на помощь призываем и к цельбоносному гробу твоему припадая исцеления просим: избави нас, угодниче Христов, от злых находящих на нас и укроти волны страстей и бед возстающих на нас, да ради святых твоих молитв не обымет нас напасть, и не погрязнем в пучине греховней и в тине страстей наших. Моли, преподобне отче Павле, Христа Бога нашего, да подаст нам мирное жительство, оставление грехов, душам нашым спасение и велию милость. Аминь.

Тропарь преподобному Павлу Комельскому, Обнорскому чудотворцу
Тропарь, глас 1:
Божественною любовию от юности распалаем, Павле преподобне, вся яже в мире красная возненавидев, Христа единаго возлюбил еси, и сего ради во внутреннюю пустыню вселился еси со зверьми жити весь Христу: отунудуже и Всевидящее Око твоя труды видев, даром чудес и по преставлении обогати тя. Темже вопием ти: моли непрестанно о всех нас, честную память твою присно в песнех почитающих.

Кондак, глас 7:
Все твое умное желание к Богу вперив, Тому невозвратно от души последовал еси, в пустыню вселився, и тамо ангельски пожив, многим путевождь был еси ко спасению: сего ради и Христос тя прослави, и даром чудес обогати. Тем вси вопием ти: радуйся Павле преподобне, пустынный жителю.

Величание
Ублажаем тя, преподобне отче Павле, и чтим святую память твою, наставниче монахов и собеседниче ангелов.