Кондак 1
Избранная от всех родов Владычице Дево Богородице, ныне, припадающе к чудотворному образу Твоему, хвалебное пение и благодарение приносим Ти:
Радуйся, Пренепорочная Отроковице, града нашего небесная заступнице.

Икос 1
Ангельския силы, прилежно молящияся и благоговейно служащия Ти, Пресвятая Дево, от лет древних на гербе богоспасаемаго града Минска изображены быша во свидетельство чуднаго Твоего о нас попечения. Мы же земнороднии, дерзающе подражати песнь ангельскую, благодарственно Тебе поем:
Радуйся, о зачатии Сына от Духа Святаго архангелом предвозвещенная;
Pадуйся, благовестия архангелова восприемнице смиренная.
Радуйся, херувимов и серафимов честнейшая;
Pадуйся, архангелов и ангелов славнейшая.
Радуйся, превыше сил небесных вознесенная;
Pадуйся, от горних воинств почитаемая.
Радуйся, лики ангельскими песнословимая;
Pадуйся, от всех родов присно ублажаемая.
Радуйся, прибежище наше и заступление;
Pадуйся, в скорбех и напастех вспоможение.
Радуйся, за христиан усердная молитвеннице;
Pадуйся, за ны пред Богом милостивая предстательнице.
Радуйся, Пренепорочная Отроковице, града нашего небесная заступнице.

Кондак 2
Видевши святый образ Твой, Пречистая, святым Лукою первописанный, рекла еси: «С сим образом благодать Моя и сила да пребудет». И во Минстем образе зряще сбытие словес Твоих, прославим Господа, поюще Ему: Аллилуия.

Икос 2
Разумети не можно дивнаго промысла Божия, како чудная икона Твоя, Богородице, насадителю веры православныя благоверному князю Владимиру на помощь дадеся во апостольстве его от Царьграда и Корсуни даже до Киева. Мы же, преискренне умиляющеся Твоему о роде нашем предстательству, верно вопием:
Радуйся, истиннаго благочестия наставнице;
Pадуйся, языческаго нечестия искоренительнице.
Радуйся, чудотворною иконою, аки драгоценным даром, князя Владимира обогатившая;
Pадуйся, в равноапостольных трудех его укрепившая.
Радуйся, власть демонскую сокрушившая;
Pадуйся, веру православную в земли нашей утвердившая.
Радуйся, Тобою бо от прелести диаволи свобождаемся;
Pадуйся, Тобою бо познания Творца сподобляемся.
Радуйся, козней вражиих посечение;
Pадуйся, верных чад Отцу Небесному усыновление.
Радуйся, зловерия идольскаго попрание;
Pадуйся, учения Христова насаждение.
Радуйся, Пренепорочная Отроковице, града нашего небесная заступнице.

Кондак 3
Силу благодати, явленныя в честней иконе Твоей, Владычице, виде святый равноапостольный князь Владимир и со благоговением велиим постави ю в Десятинней церкви града Киева, вопия Богу: Аллилуия.

Икос 3
Имущи попечение Матернее о просвещенных людех земли Русския, соделала еси сию дом Свой и токи чудес от иконы Твоея преизобильно источила еси, Богородице, сего ради взываем Ти сице:
Радуйся, притекающих к иконе Твоей лучами чудес озаряющая;
Pадуйся, обращающимся к ней безчисленныя милости подающая.
Радуйся, всем просящим море щедрот изливающая;
Pадуйся, духовную радость всем соделывающая.
Радуйся, о людех православных присное попечение;
Pадуйся, образ Твой даровавшая нам, яко залог спасения.
Радуйся, источниче благодати неистощимый;
Pадуйся, кладезю сокровищ многоценный.
Радуйся, крепосте твердая веры православныя;
Pадуйся, всем чтущим Сына Твоего помоще преславная.
Радуйся, путь истины указующая заблуждшим;
Pадуйся, скоро поспешствующая на помощь Тя призывающим.
Радуйся, Пренепорочная Отроковице, града нашего небесная заступнице.

Кондак 4
Бури бед и напастей за грехи наша многажды на Русь воздвизаемы быша, такожде и град Киев огню и мечу предаваем бе от нечестивых агарян, не ведущих пети истинному Богу: Аллилуия.

Икос 4
Слышав богатство Киева, хан агарянский во едино лето устремися расхитите е и град той пожже. Воин же некий злочестивый взят ризу многоценную, всеблагая Мати, икону же Твою вверже в Днепр, обаче сия неврежденна в водах сохранися, подвизающи нас восхваляти Тя сице:
Радуйся, образ Твой, яко купину неопальну явившая;
Pадуйся, икону Твою от пламене сохраншая.
Радуйся, по водам аки по суху от Киева даже до Минска икону Твою пренесшая;
Pадуйся, воды Немиги и Свислочи явлением Своим освятившая.
Радуйся, Царице небесе и земли, Ейже вся стихии покоряются;
Pадуйся, Тобою бо на спасительныя стези людие наставляются.
Радуйся, потопа греховнаго усмирение;
Pадуйся, страстей свирепых укрощение.
Радуйся, моря житейскаго благонадежное прохождение;
Pадуйся, от земли на небо верных возведение.
Радуйся, дивное благодати знамение;
Pадуйся, силы чудотворныя явление.
Радуйся, Пренепорочная Отроковице, града нашего небесная заступнице.

Кондак 5
Боготечней звезде уподобися пречестная икона Твоя, Богородительнице, чудными лучами осиявшая насельники града Минска. Тии же, таинственное явление ея на водах Свислочи зряще, со умилением воспеша Сыну твоему: Аллилуия.

Икос 5
Видевше чудную икону сию, о Всемилостивая, и приемлюще, яко дар Божий, людие христианстии взяша ю от воды и поставиша в церкви замковой в честь преславнаго Рождества Твоего, и абие благодарне воззваша:
Радуйся, от иконы Твоея дары многоразличныя источающая;
Pадуйся, яко Самой Ти сущей, во иконе Твоей благодать нам изливающая.
Радуйся, грешники не отметающая;
Pадуйся, кающихся тепле приемлющая.
Радуйся, града нашего неусыпная хранительнице;
Pадуйся, за нас пред Богом любвеобильная ходатаице.
Радуйся, веры и благочестия исправление;
Pадуйся, в молитвах ко Господу всемощное дерзновение.
Радуйся, болящих и немощствующих исцеление;
Pадуйся, заблуждших на путь правый наставление.
Радуйся, благодати обильное дарование;
Pадуйся, людей христоименитых непостыдное упование.
Радуйся, Пренепорочная Отроковице, града нашего небесная заступнице.

Кондак 6
Проповедницы чудес велиих, от иконы Минския истекающих, явишася мнозии людие, ихже Tы, премилосердная Владычице, поклонятися святыне сей научила еси, да неложно воспоют Богу: Аллилуия.

Икос 6
Возсия и возвеличися вера наша по мнозех летех пленения лестнаго и неправаго, и паки возвратися икона Минская людем православным, иже с радостию воспеша Богородице:
Радуйся, Православия щите и ограждение;
Pадуйся, отеческих уставов незыблемое утверждение.
Радуйся, маловерных вразумление;
Pадуйся, в сомнении сущим снисхождение.
Радуйся, верных чад Церкве Православныя духовное услаждение;
Pадуйся, отступников правыя веры посрамление.
Радуйся, православных немолчная похвало;
Pадуйся, гонимым за веру несокрушимое забрало.
Радуйся, утесняемым скорое вспоможение;
Pадуйся, мучеников и исповедников неизглаголанная отрадо.
Радуйся, искушаемым помоще;
Pадуйся, обуреваемым пристанище.
Радуйся, Пренепорочная Отроковице, града нашего небесная заступнице.

Кондак 7
Хотя Владыка наш и Судия праведнейший вразумити землю Русскую за беззакония тьмочисленная, попусти мучителем гнати Церковь Православную, да вси, в покаяние пришедше, возопиим Ему: Аллилуия.

Икос 7
Новое наста испытание от Господа, егда соборный храм во граде Минске разрушен бысть от неистовых гонителей. Икона же Твоя, о Богомати, отъята и сокрыта бе от верных. Людие же православнии в сокрушении сердца возопиша к Богородице:
Радуйся, во дни правосуднаго Божия посещения гнев Его отводящая;
Pадуйся, в тяжких злостраданиих нас не оставляющая.
Радуйся, лютыя крамолы обличающая;
Pадуйся, душегубительная учения низлагающая.
Радуйся, благосердая наша вразумительнице;
Pадуйся, непамятозлобная наша наставительнице.
Радуйся, в злых обстояниих неистощимое терпение;
Pадуйся, с правосудием Божиим смиренное примирение.
Радуйся, малодушных и падших востание;
Pадуйся, духа уныния и боязни отгнание.
Радуйся, грехов наших отпущение;
Pадуйся, Божие к нам благоволение.
Радуйся, Пренепорочная Отроковице, града нашего небесная заступнице.

Кондак 8
Странное и ужасное нашествие иноплеменных постиже нас, милосердием же Божиим одолеша врагов людие предстательством Богоматере, отверзоша храмы православныя и воздаша благодарение Господеви, воспевающе Ему: Аллилуия.

Икос 8
Вся исполнися радости неизреченныя раба Божия Варвара, егда обрете чудный образ Твой, Мати Дево, сокрытый посреде праха и тления. Мы же, дивящеся таковому нечаемому обретению, восхваляем Тя:
Радуйся, веру Христову от поругания защищающая;
Pадуйся, праведный гнев Божий на милость претворяющая.
Радуйся, отступников веры постыжающая;
Pадуйся, нечестие грешников обличающая.
Радуйся, броне неуязвимая;
Pадуйся, воеводо непобедимая.
Радуйся, от нашествия иноплеменных избавление;
Pадуйся, от работы вражия свобождение.
Радуйся, видимых и невидимых супостат одоление;
Pадуйся, враждующих скорое вразумление.
Радуйся, упокоение за други своя души положивших;
Pадуйся, прославление за веру и отечество на поле брани убиенных.
Радуйся, Пренепорочная Отроковице, града нашего небесная заступнице.

Кондак 9
Всякое разумение человеческое не возможет исчести страдания, яже претерпеша граждане отечествия нашего в годину войн, лихолетий и в последнее время от беды Чернобыльския. Взирающе же на икону Твою, Богомати, яко на цельбоносное утешение, непрестанно поем: Аллилуия.

Икос 9
Ветии суемудрении соблазняются о древности иконы Минския и недоумеют постигнути таинственный промысл Божий, сохранивый ю в огне и водах, от рук иноплеменных и злоумышлении супротивных. Мы же, прославляюще Богородицу, пред чудотворным образом Ея вопием таковая:
Радуйся, почитания святых икон увенчание;
Pадуйся, иконоборнаго злочестия обличение.
Радуйся, душеполезных знаний преизобильное излияние;
Pадуйся, душевреднаго мрака светлое озарение.
Радуйся, неверных смыслов милостивное просвещение;
Pадуйся, неправо мудрствующих внезапное низвержение.
Радуйся, верных незыблемое уверение;
Pадуйся, отъемлющая духовное помрачение.
Радуйся, промысла Божия прославление;
Pадуйся, прегордых хулителей устрашение.
Радуйся, суемудренныя премудро смиряющая;
Pадуйся, заблуждшия кротко вразумляющая.
Радуйся, Пренепорочная Отроковице, града нашего небесная заступнице.

Кондак 10
Спасительное пристанище от житейских треволнений имамы во храме Духа Святаго богоспасаемаго града нашего, идеже светозарная икона Твоя, Владычице, неотступно доныне пребывает, всех нас путеводящи к жизни вечней. Сего ради о Тебе возглашаем Богу: Аллилуия.

Икос 10
Стена и заступление не токмо граду нашему, но и всем с верою притекающим к Тебе, Преблагословенная, дадеся икона Твоя, еюже многажды благодеяла еси нам и отцем нашим, да вознесем Ти пение таковое:
Радуйся, ищущим спасения правый путь указующая;
Pадуйся, снисшедшия даже до дна адова молитвами Своими спасающая.
Радуйся, супротив нашествия иноплеменных нас воздвизающая;
Pадуйся, от врагов отечество наше избавляющая.
Радуйся, отчаянных скорое услышание;
Pадуйся, недугов душевных и телесных безмездное врачевание.
Радуйся, печалей житейских утоление;
Pадуйся, греховных язв очищение.
Радуйся, во обстояниих сущим всегдашняя помощнице;
Pадуйся, людем благоверным усердная споспешнице.
Радуйся, нечаянная радосте;
Pадуйся, непостыдная надеждо.
Радуйся, Пренепорочная Отроковице, града нашего небесная заступнице.

Кондак 11
Пение и моление о богохранимей стране нашей, властех, воинстве и народе ея приими пред чудотворным образом Твоим, Владычице, и спаси нас, яко держащая скипетр в руце Своей. Богомладенец же Иисус, имеяй в деснице державу, да дарует нам тихое и безмолвное житие, слыша от нас: Аллилуия.

Икос 11
Светлый праздник явления иконы Твоея, Приснодево, во граде Минске исполняет ликованием сердца наша. Сего ради с верою припадающе и с любовию лобызающе чудный образ Твой, вопием Ти:
Радуйся, богоспасаемому граду нашему милость показавшая;
Pадуйся, нас грешных сиянием Своим просветившая.
Радуйся, присно силу Свою являющая;
Pадуйся, предстательством Своим нас спасающая.
Радуйся, молитвы наша приемлющая;
Pадуйся, хваления наша не отвергающая.
Радуйся, небожительми присно прославляемая;
Pадуйся, собором белорусских святых и новомучеников сугубо воспеваемая.
Радуйся, людьми благочестивыми в позлащенную ризу облеченная;
Pадуйся, многими бисеры и адаманты преукрашенная.
Радуйся, сердец наших тихое умиление;
Pадуйся, жития нашего доброе устроение.
Радуйся, Пренепорочная Отроковице, града нашего небесная заступнице.

Кондак 12
Благодати Твоей, о всемилостивая Мати, не лиши нас грешных, претерпеваем бо днесь новыя скорби и нестроения, никакоже имуще надежды оправдитися, но помози нам востати от погибельных смут, да, о Тебе радующеся, воспоем Богу: Аллилуия.

Икос 12
Поюще небесную Заступницу нашу веруем и исповедуем, яко и в последняя времена явиши благодатную помощь и имиже веси судьбами сохраниши нас от соблазнов мира сего, да благодарне восхвалим Тя:
Радуйся, избавление наше от навет вражиих;
Pадуйся, спасение от коварств лукаваго.
Радуйся, от сна греховнаго пробуждение;
Pадуйся, беззаконий наших прощение.
Радуйся, пред Всевышним благоговейное предстояние;
Pадуйся, полчищ сатанинских благомощное разсеяние.
Радуйся, погибших взыскание;
Pадуйся, прельщенных вразумление.
Радуйся, внезапную смерть от нас отводящая;
Pадуйся, кончину христианскую нам ходатайствующая.
Радуйся, врата небесная нам отверзающая;
Pадуйся, к жизни вечней нас приводящая.
Радуйся, Пренепорочная Отроковице, града нашего небесная заступнице.

Кондак 13
О всепетая Мати, заступнице града нашего, приими сию малую молитву и умоли Сына Твоего, Судию Праведнаго, да сподобит деснаго стояния нас, вопиющих Ему: Аллилуия.
Этот кондак читается трижды, затем 1-й икос и 1-й кондак

Молитва Пресвятой Богородице пред иконой Ея «Минская»
О всепетая и всеблагая Дево Богородице, небесная наша заступнице! К Тебе по Бозе, яко премилосердней Госпоже, соборне прибегаем и вопием: приими сие малое хвалебное пение, сохрани богоспасаемый град сей, емуже чудотворная икона Твоя во отраду и утешение дадеся. Молим Тя, Владычице всемилостивая: избави нас от враг видимых и невидимых, от нашествия иноплеменных и междоусобныя брани, от злаго обстояния и скорби, от искушений, бед и болезней. Спаси и помилуй рабы Твоя: великаго господина и отца нашего Алексия, Святейшаго Патриарха Московскаго и всея Руси, преосвященныя митрополиты, архиепископы, епископы, весь священнический и монашеский чин и весь причет церковный. Приими под кров Твой власти и воинство богохранимыя страны нашея, вразуми и настави их право правити, заповеди Божия соблюдающе, да тихое и безмолвное житие поживем во всяком благочестии и чистоте. О Пресвятая Владычице! Не забуди нас во вся дни жизни нашея и да пребывает с нами неотступно образ Твой честный. Во время же исхода нашего пролей теплую молитву ко Праведному Судии, да презрев безчисленная согрешения наша, помилует и спасет нас, яко благ и Человеколюбец. Аминь.

Тропарь Божией Матери ради иконы Ее, именуемой Минская
Тропарь, глас 5:
На древе крестнем явилася еси, Пренепорочная Отроковице, от Царьграда и Киева Богоспасаемому граду Минску милость показавши. Просвети нас, грешных, сиянием Своим, яви, яко присно, силу Свою, спаси нас предстательством Своим и избавляй от навет вражиих, Тя бо Необоримую Стену и едину Надежду имамы.

Ин тропарь, глас 6:
На водах Свислочи явилася еси, Пренепорочная Отроковице, от Царьграда и Киева богоспасаемому граду Минску милость показа, просвети нас грешных сиянием Своим, яви, яко присно, силу Твою, спаси нас предстательством Своим и избави от навет вражиих, Тя бо необориму стену и едину надежду имамы.

Кондак, глас 8:
Благодарственная приносяще Ти раби Твои, Богородительнице, о всех, имиже благодеяла еси граду нашему из глубины души взываем Тебе: не престани, Владычице Матерними к Сыну Твоему молитвами подавати вся благая и спасительная всем с верою и любовию вопиющим Тебе: радуйся, Дево, христиан похвало.