Кондак 1
Взбранных воевод небесных Творче и Господи, всех любящих Тебе неизреченное веселие, в день скорби моея хвалу восписую Тебе умиленную, Ты же Адама от смерти возставивый и Еву от слез и печали избавивый, призри на мя от печали на всяк день стужаема и Тебе в сокрушении сердца молитвенно зовуще:
Господи мой, Господи, радосте моя, даруй ми да возрадуюся о милости Твоей.

Икос 1
Ангелом своим безплотным служителем заповедый хранити души человеческие на всех путях жития превратного, Всемилосердный Господи, не попусти мене в день испытания уклонитися на пути уныния, но пошли мне Ангела Твоего, укрепляюща мя в терпении, и не презри моих воздыханий сердечных, имиже Тебе молюся сице:
Господи мой, Господи, Ты дал еси мне жизнь и дыхание, сохрани ныне душу мою от уныния.
Господи мой, Господи, Ты вдунул еси в лице мое душу безсмертную, воздвигни мя над прахом и тлением.
Господи мой, Господи, Ты предуставил еси пределы жития человеческаго, отврати от мене горесть напрасныя смерти.
Господи мой, Господи, Ты со мною пребываеши, не остави мене в он же день скорблю.
Господи мой, Господи, Тебе мое пение, услыши мя ныне тепле молящагося.
Господи мой, Господи, радосте моя, даруй ми да возрадуюся о милости Твоей.

Кондак 2
Землю и мир весь, и вся яже в мире создавый Господи, вем яко в вышних живеши и на смиренныя призираеши. Что есть человек? Но Ты помниши его, или сын человеч, но Ты пощаеши его, к Тебе убо в день уничижения прибегаю и Тебе в сокрушении сердца пою: Аллилуиа.

Икос 2
К кому аз прибегну в день скорби? К кому воззову в день печали? Аще не к Богу, спасающему мя от малодушия и от бури, рекшему сладчайший глагол: «Приидите ко Мне, вси труждающиися и обремененнии, и Аз упокою вы, и обрящете покой душам вашим». Ныне убо из бездны отчаяния прихожу к Тебе, Господи, за грехи мои аз праведный гнев Твой приях. Но каяся, ими Твое призываю, Господи, спаси мя, к Тебе бо взываю из глубины души:
Господи мой, Господи, идеже Ты пребываеши, тамо потребляется всякая печаль.
Господи мой, Господи, идеже Ты не присещаеши оттуду всякая радость отъемлется.
Господи мой, Господи, без конца согреших пред Тобою, но не погуби мене до конца.
Господи мой, Господи, страшен грешнику гнев Твой, но и велия к падшему милость Твоя.
Господи мой, Господи, в падении моем отступих от Тебе, но привлецы мя, якоже блуднаго.
Господи мой, Господи, во гресех моих укрыхся от Тебе, но взыщи мя, яко погибшую драхму.
Господи мой, Господи, радосте моя, даруй ми да возрадуюся о милости Твоей.

Кондак 3
Боготечною кровию, Спасе, от вечныя смерти мя спасл еси, даровав мне Твой Крест честный на попрание адовы силы, но аз окаянный греху поклонився, расслаблен являюся телом и духом. Темже к Тебе вопию из греховныя бездны: Грех мой очисти, о Боже, да паки возстану и на врага ополчуся, поя Тебе песнь: Аллилуиа.

Икос 3
От юности моея недоумеваю аз о житии моем и не вем исхода моего и входа моего, киим путем пойду и кому подражаю в житии да блаженств небесных улучу часть. Ты же, Господи, открывая ми пути заповедей Твоих, рекл еси: «Блажени нищии духом». Но бысть мне слово сие, яко вода мимотекущая, ибо путь гордых избрах паче смирения и самовозношение приях паче нищеты духовныя, темже смятение духа вместо покоя обретох. Ныне же в сокрушении сердца вопию к Тебе:
Господи мой, Господи, благо мне, яко смирил мя еси, приими мя во смирении моем.
Господи мой, Господи, благо мне на Тебя надеятися, покрый мя от всякаго зла да не к тому убоюся.
Господи мой, Господи, благ мне закон Твой, научи мя поучатися в нем день и нощь.
Господи мой, Господи, блага мне милость Твоя, со мною пребуди в день скорби.
Господи мой, Господи, благи мне все судьбы Твоя, воззову к Тебе: услыши мя.
Господи мой, Господи, благи дни от Тебе видех, помози ми и в злы дни не отчаятися.
Господи мой, Господи, радосте моя, даруй ми да возрадуюся о милости Твоей.

Кондак 4
Грехов моих бурями потопляем, камо иду, аща не к пристани храма святаго Твоего, идеже тихое всем веет дыхание благодати Твоея; идеже матернии молитвы приносит за мир Пречистая Матерь Твоя, скорби сердца человеческаго ведуще, и отраду духу моему сокрушенному подающе, да печаль яко прах отрину, поя Богу: Аллилуиа.

Икос 4
Указуя ми путь в Царство Небесное, рекл еси Господи: «Блажени плачущии». Аз же не восхотев сему блаженству приобщитися, не разумех, яко сеющии слезами радости пожнут. И любезен мне бысть жребий веселящихся, но веселия взыскуя, обретох печаль. И ныне сетуя хожду, и Тебе вопию аз моляся:
Господи мой, Господи, укрепи мя взыскати заповеди и оправдания Твоя.
Господи мой, Господи, удержи мя суетным мира сего не работати.
Господи мой, Господи, оправдай мя от грехов моих, да исполнятся уста моя радости.
Господи мой, Господи, возбуди мя, да некогда усну в смерть во унынии.
Господи мой, Господи, помоги ми, благая приявшему, и злая до конца претерпети.
Господи мой, Господи, радосте моя, даруй ми да возрадуюся о милости Твоей.

Кондак 5
Великий в рожденных женами Креститель Твой, Господи, гласом сострадания и обличения и ныне вопиет в пустыни сердца моего: «Покайся! Приближися бо Царствие Божие». Аз же земным прелестям уязвихся, уши имам, но не слышу сих спасительных глаголов. Темже и в ров страстей, яко слепый, впадох, отнюду же щедре воззови мя, да надежду на прощение прииму и гласом радования воспою Тебе: Аллилуиа.

Икос 5
Оправдании Твоими ко спасению мя грешнаго привлекая, Ты рекл еси, Господи: «Блажени кротции». Аз же не послушав гласа Твоего, на сильных возложих упование, надменными мнях наследити землю. Но се ныне очима вижу, яко сильнии низлагаются, и како крепцыи оскудевают, и изнеможе крепость моя, смятошеся во мне дух мой, темже к Тебе, Господи, воззову и к Богу моему вздыхая молюся:
Господи мой, Господи, помилуй мя, яко к Тебе прибегая спасуся.
Господи мой, Господи, вонми ми, яко к Тебе возопих: не остави мене.
Господи мой, Господи, не отрини мене, яко уныл во мне дух мой.
Господи мой, Господи, приими мя, яко Тебе желает душа моя.
Господи мой, Господи, оживотвори мя, яко боязнь смерти обхят мя.
Господи мой, Господи, радосте моя, даруй ми да возрадуюся о милости Твоей.

Кондак 6
Зовут мя апостоли Твои, Господи, в послушание заповедем Твоим святым. Но аз благое иго Твое отвергох, яко тяжкое, и легкое бремя, яко неудобоносимое, и врагу приклоних слух и тому в рабство лютое впадох. Избавителю и защитителю мой, Господи, воззови мя от горести моея, да пою Тебе песнь избавления: Аллилуиа.

Икос 6
Законополагая мне путь жизни и спасения, глаголал еси усты Твоими, Господи: «Блажени алчущии и жаждущии правды». Аз же не в правде, но в силе полагах спасение, и не на небеси, а на земли правды взысках. И умножися на мя неправда гордых, и печаль прият от возстающих на мя. Темже к Тебе ныне прибегая, молюся:
Господи мой, Господи, просвети очи мои и уразумею тайну чудес Твоих.
Господи мой, Господи, отверзи уши мои, да научуся оправданием Твоим.
Господи мой, Господи, исцели сердце мое, да укреплюся в заповедех Твоих.
Господи мой, Господи, расшири уста моя, и да возглашаю выну хвалу Тебе.
Господи мой, Господи, возбуди душу мою, да не пребудет до конца в унынии и печали.
Господи мой, Господи, возвесели дух мой, да радуяся, исповедаю Тя во дни и в нощи.
Господи мой, Господи, радосте моя, даруй ми да возрадуюся о милости Твоей.

Кондак 7
Все множество святых мученик Твоих, Господи, пролиявших кровь за имя Твое святое, гласом подвигов своих вопиет в слух сердца моего: Не возлюби зло и вся злая. Но аз греховными связася похотьми, врагу и погубителю спасения моего служу, и от дома Отчаго Твоего, яко блудный сын, в страну далече отхожду, приложихся скотом безсмысленным и уподобихся им. Ты же любовию безпредельною обращаеши мя и в язвы совести влагаеши персты спасительные, да исполнен и обновлен воспою Тебе: Аллилуиа.

Икос 7
Аз вем, Господи, вящую заповедь Твою человеком: «Блажени милостивии», но превозношу и исполняю сию усты токмо, сердце же мое окаменело пребывает и не принесох Тебе, Благий, плодов милосердия, сего ради и постиже мя праведный Суд Твой, писано бо есть: суд без милости к несотворившему милости. Темже из глубины души моея вопию к Тебе:
Господи мой, Господи, щедрый и милостивый, помилуй мя немилосерднаго.
Господи мой, Господи, долготерпеливый, даруй ми совершати плод покаяния.
Господи мой, Господи, святый и благословенный, научи мя делам милосердия.
Господи мой, Господи, Свете неприступный, коснися мя и жестокое сердце мое умягчи.
Господи мой, Господи, седяй на Херувимех, вознеси мя долу грехами приклоненнаго.
Господи мой, Господи, певаемый от Серафимов, услыши воздыхание души моея.
Господи мой, Господи, радосте моя, даруй ми да возрадуюся о милости Твоей.

Кондак 8
Хощеши, Боже мой Премилосердный, да спасуся и в разум истины прииду, сонм же преподобных Твоих образ мне подает, как терпением и нуждою восхищати Царствие Твое. Но враг от юности моея мя искушает и страстьми палит мя, до ада низводя душу мою, темже от нощи и мрака уныния и печали вопию Тебе, Свете мой, лучами надежды спасения озари мя и даждь дыханию моему изнести Тебе хвалебный глас: Аллилуиа.

Икос 8
Истинный путь указуя недоумевающей душе моей, Ты рекл еси, Господи: «Блажени чистии сердцем». Аз же от юности моея грехами многими сердце мое оскверних и зерцало совести омрачих. Темже не могу ныне воззрети на высоту небесную, до ада низверженный и в пучине греховной потопляемый, отнюдуже яко Иона вопию моляся:
Господи мой, Господи, Сотворителю мой, сердце чисто созижди во мне.
Господи мой, Господи, обновителю мой, дух прав обнови во утробе моей.
Господи мой, Господи, Спасителю мой, спаси десницею Твоею раба Твоего.
Господи мой, Господи, наставниче мой, наставь мя на путь Твой.
Господи мой, Господи, просветителю мой, просвети светильник мой во спасение.
Господи мой, Господи, покровителю мой, покрый мя от всех ненавидящих и обидящих.
Господи мой, Господи, радосте моя, даруй ми да возрадуюся о милости Твоей.

Кондак 9
Сердце смятеся во мне, боязнь и трепет нападе на мя, егда посети мя праведный гнев Твой, Господи, и познав вину горькаго падения моего, ждах в скорби соскорбящаго и не взысках, в печали же утешающаго и не обретох, Ты бо един еси источник утешения и Тебе во умилении сердца пою: Аллилуиа.

Икос 9
Победу над грехом уготовляя ми, учил еси Господи, глаголя: «Блажени миротворцы». Аз же не восхотев обути нози мои во уготование и благовествование мира ближним и дальним, но вражду, свару, злобу, рвение, разжение и многия грехи, имже несть числа, возлюбих. Единению мира и духа никакоже послушах и плода правды миром не принесох. Сего ради недостоин Отцем нарещи Тя, Небеснаго Бога, и яко раб неключимый, вопию Тебе моляся:
Господи мой, Господи, мир Твой с высоты принесый, укрепи во мне нрав миролюбия.
Господи мой, Господи, мир нам преподавый, угаси во мне огонь самолюбия.
Господи мой, Господи, правда сый и мир на земли, научи мя миром служити Тебе.
Господи мой, Господи, вышний мир любящим Тя, утоли во мне всякую вражду и ненависть.
Господи мой, Господи, мир свой нам оставивый, благослови люди Твоя миром.
Господи мой, Господи, радосте моя, даруй ми да возрадуюся о милости Твоей.

Кондак 10
Аще не Ты мя во объятия Отча приемлеши, Господи, к кому прибегну аз, напастьми гонимый? Аще Ты не избавиши, Спасе мой, избавит ли человек? Богатство мимо течет, слава, яко дым, исчезает, гордыня даже до праха смирится, и лукавство обличается. К Тебе убо Господи Боже, прибежище мое, прибегаю, потоком сладости Твоея напой мя и да с радостию воспою Тебе: Аллилуиа.

Икос 10
Стояти за правду Твою наставляя мя, глаголал еси Христе Спасе наш: «Блажени изгнании правды ради». Аз же неправду и злобу паче благостыни возлюбих, сего ради изгнан есмь от лица Твоего и несмь достоин воззрети на высоту славы Твоея. Темже в скорби сый милости от Тебе взыскую моляся:
Господи мой, Господи, в вышних живый, свыше осияй мою бездну грехов.
Господи мой, Господи, на смиренныя призираяй, возведи от тли живот мой.
Господи мой, Господи, тайны сердца испытуяй, озари светом душу мою.
Господи мой, Господи, возводяй из тьмы низверженныя, изведи из темницы греховныя душу мою.
Господи мой, Господи, возводяй нища и убога, возстави мя и правдою Твоею спаси мя.
Господи мой, Господи, сотворивый небеса разумом, воздвигни душу мою из мглы неразумия.
Господи мой, Господи, радосте моя, даруй ми да возрадуюся о милости Твоей.

Кондак 11
Егда приидеши во Славе Своей, Господи, и на суде Твоем вопросиши мя о содеянных мною, откуду начну плакати моего окаянства; все бо житие мое изждих сластолюбиво: алчущаго не напитах, жаждущаго не напоих, в болезни и темнице сущаго не посетих; скорбящаго не утеших, о ближнем моем николиже вспомянух. Но Ты, Жизнодавче, подаждь мне время на покаяние, да слезами моими омоется одежда души моея, и в ризе светлой предстану пред Славой Твоей поя: Аллилуиа.

Икос 11
Святых Твоих учеников апостолов утверждая в непоколебимой вере, рекл еси Господи: «Блажени есте егда поносят вам и ижденут и рекут всяк зол глагол на вы лжуще Мене ради». Они же духом пламенея, смертию запечатлеша веру, но аз же теплохладен сый, не студен ниже горящь бых, стыдяся Тебе и Твоих словес пред человеки глаголати, сего ради горькую часть уготовляю себе на Суде Твоем, Господи. Темже из клети сердца моего каяся и совестию снедаем, молюся Ти с умилением тепле:
Господи мой, Господи, верую, темже и возглаголю, помози моему неверию.
Господи мой, Господи, прискорбна есть душа моя, устрой существо мое ко спасению.
Господи мой, Господи, смятеся сердце мое, не вмени мне грехов моих множество.
Господи мой, Господи, уныл во мне дух мой, не постыди мене на суде Твоем.
Господи мой, Господи, во век исповемся Тебе, обрати в радость печали мои.
Господи мой, Господи, готово сердце мое, отжени от мене дух уныния.
Господи мой, Господи, радосте моя, даруй ми да возрадуюся о милости Твоей.

Кондак 12
Многими бедами лютыми содержим, многими стрелами вражиими уязвлен, и впадох в пучину отчаяния, горечь и желчь се пища моя, печаль и сетование питие мое. Но Ты, Избавителю мой, молитву дал еси мне, яко крыле голубине, и полещу, и надежду на спасение Твое обрету, воспевая радостно ангельский глас: Аллилуиа.

Икос 12
Якоже к ближнему, яко к брату любимому, приходиши ко мне любвеобильно, Господи, и глаголиши: «Се стою при дверех и стучу. Аще услышиши глас Мой и отверзеши двери души твоея, вниду к тебе и вечеряю с тобою, и ты со Мною». Аз же, слышах глас сей, Давидски вопию Тебе: «Коль сладка гортани моей словеса Твоя, паче меда устом моим». Темже услыши глас воздыхания моего, имже Тебе помолюся от седца:
Господи мой, Господи, не отрини мене, окаянен есмь грехов моих ради.
Господи мой, Господи, обогати мя духом Твоим Святым, бедна есть душа моя добродетелию.
Господи мой, Господи, приими мя под кров Твой, нищ бо есмь, яко забвен и оставлен.
Господи мой, Господи, скажи мне путь, в оньже пойду, слеп бо есмь, не разумею путей Твоих.
Господи мой, Господи, просвети одеяние души моея, наг бо есмь, погубив добродетели ризу.
Господи мой, Господи, отверзи ми дверь спасения, странен бо есмь и лишен дома Отца моего иже на небесех.
Господи мой, Господи, радосте моя, даруй ми да возрадуюся о милости Твоей.

Кондак 13
О Боже Святый! О Боже крепкий! О Боже безсмертный! В трех лицах Единый Господь мой Спаситель и Преблагий Искупитель! Услыши мя горько зовуща, вонми воздыханиям слезным. Подаждь ми терпение в скорби, скоро пошли утешение в печали. Да славлю Твою неизреченную и всемогущую власть и державу, и в час избавления имя Твое воспою: Аллилуиа.
Сей кондак читается трижды, затем икос 1 и кондак 1

Молитва
Спаси мя, Спасе мой, по милости Твоей, не по делом моим. Ты хощеши мя спасти. Ты веси, коим образом спасти мя. Спаси убо мене, якоже хощеши, якоже можеши, якоже веси. Имиже веси судьбами, спаси мя. Аз на Тя, Господа моего, надеюся, и Твоей воли святой себе вручаю. Твори со мною, еже хощеши: аще хощеши мя имети во свете, буди благословен; аще хощеши мя имети во тьме, буди паки благословен. Аще отверзеши ми милосердия Твоего двери, добро убо и благо; аще затвориши ми двери милосердия Твоего, благословен еси, Господи, затворивый ми по правде. Аще не погубиши мя со беззаконьми моими, слава безмерному милосердию Твоему; аще погубиши мя со беззаконьми моими, слава праведному Суду Твоему. Якоже хощеши, устрой о мне вещь. Аминь.

Тропари
Помилуй нас Господи, помилуй нас: всякаго бо ответа недоумеюще, сию Ти молитву яко Владыце грешнии приносим: помилуй нас.

Слава:
Господи, помилуй нас, на Тя бо уповахом; не прогневайся на ны зело, ниже помяни беззаконий наших, но призри и ныне яко благоутробен, и избави ны от враг наших; Ты бо еси Бог наш, и мы людие Твои, вси дела руку Твоею, и имя Твое призываем.

И ныне:
Милосердия двери отверзи нам, благословенная Богородице, надеющиися на Тя да не погибнем, но да избавимся Тобою от бед: Ты бо еси спасение рода христианскаго.